म्याग्दी । हिमाल, पहाड र नदीले घेरिएको म्याग्दीको रघुगंगा गाउँपालिकाले पछिल्लो नौ वर्षमा सीमित स्रोतसाधनका बीच विकास निर्माणलाई तीव्रता दिएको जनाएको छ । गाउँपालिका अध्यक्ष भवबहादुर भण्डारीको नेतृत्वमा सडक, शिक्षा, स्वास्थ्य, खानेपानी, खेलकुद, पर्यटन, कृषि, विद्युत्, लघुउद्यम तथा विपद् व्यवस्थापनका क्षेत्रमा विभिन्न काम अघि बढाइएको हो ।

विकट भूगोल र कठिन भौगोलिक अवस्थाका कारण विकास निर्माण चुनौतीपूर्ण भए पनि गाउँ–गाउँमा सडक विस्तार, आधारभूत सेवा प्रवाह तथा स्थानीयको आयआर्जन बढाउने कार्यक्रमलाई प्राथमिकता दिइएको गाउँपालिकाले जनाएको छ ।

वडा नम्बर १ : सडक विस्तारदेखि अस्पतालका लागि जग्गासम्म

वडा नम्बर १ बेगमा पछिल्लो नौ वर्षमा सडक सञ्जाल विस्तारलाई प्राथमिकता दिइएको छ । तिप्ल्याङ–बतासे, तिप्ल्याङ–बाँदुक, बेगखोला–बेग, राखु भगवती–सिरुबारी, पञ्चासे–सिमफाँट, सेउलेचोक–तुसारे–बाउन स्वारा, बेग–धूपीरुख–घातपा तथा ओखले–बदेनी सडक निर्माण गरिएको छ । राखु–बेग मोटरबाटोसमेत स्तरोन्नति गरिएको छ ।

वडामा विभिन्न युवा क्लबका खेलमैदान तथा स्टेज, वडा कार्यालय, महिला सहकारी भवन र तीनवटा टोलमा सभाहल निर्माण भएका छन् । कालिका आधारभूत विद्यालयमा कक्षा १० सञ्चालनका लागि आवश्यक कक्षाकोठा निर्माण गरिएको छ ।

बाँदुकमा स्वास्थ्य इकाइ स्थापना गरी कर्मचारी व्यवस्थापन गरिएको छ । दास–दोसल्ले, ओखले र फाँट–लिस्नेमा झोलुङ्गे पुल निर्माण गरिएको छ भने बेग–बाँदुक झोलुङ्गे पुलका दुवै किनारमा पक्की पदमार्ग बनाइएको छ ।

बेगमा १० शय्याको अस्पताल निर्माणका लागि ७ रोपनी ८ आना जग्गा निःशुल्क व्यवस्थापन गरिएको छ । अन्तिम संस्कारका लागि घाट निर्माणसमेत गरिएको गाउँपालिकाले जनाएको छ ।

वडा नम्बर २ : सडक, शिक्षा र पर्यटनमा जोड

वडा नम्बर २ भगवतीमा २३ वटा शाखा सडक निर्माण तथा स्तरोन्नति गरिएको छ । दुई किलोमिटर मुख्य सडक र एक किलोमिटर शाखा सडक ढलान गरिएको छ । वडा कार्यालय जाने सडकसमेत ढलान गरिएको छ ।

खानेपानीतर्फ विभिन्न स्थानमा टंकी निर्माण गरी ‘एक घर, एक धारा’ कार्यक्रमअन्तर्गत तीन सयभन्दा बढी धारा निर्माण गरिएको छ । वडा भवन, सभाहल, कोल्ड स्टोर तथा स्वास्थ्य चौकीका बैठक कक्ष र आवास निर्माण गरिएका छन् ।

मुक्तिधाम माध्यमिक विद्यालयमा १२ कोठे भवनलगायत विभिन्न विद्यालयका भवन निर्माण भएका छन् । दुर्गम क्षेत्रमा सामुदायिक स्वास्थ्य इकाइ सञ्चालनका लागि जग्गा व्यवस्थापन गरिएको छ ।

विभिन्न स्थानमा खेलमैदान तथा आमा समूहका भवन निर्माण भएका छन् । भगवती दुर्गा मन्दिर, ताराखसे भ्युटावर, प्रतीक्षालय, वनभोजस्थल, शौचालय तथा प्रशिक्षण केन्द्र निर्माण गरिएको छ । रुइसेदेखि हातजोड्नेसम्म पर्यटन पदमार्ग निर्माण गरिएको छ ।

विभिन्न क्षेत्रमा पोखरी निर्माण, पहिरो नियन्त्रण तथा विद्युत् विस्तारका काम पनि भएका छन् । गनाखेमा औद्योगिक ग्राम निर्माणका लागि ३२ रोपनी जग्गा व्यवस्थापन गरिएको गाउँपालिकाले जनाएको छ ।

वडा नम्बर ३ : सडकदेखि प्रशासनिक भवनसम्म

वडा नम्बर ३ पिप्लेमा विभिन्न गाउँ तथा बस्ती जोड्ने सडक निर्माण तथा स्तरोन्नति गरिएको छ । झाँक्रे, अल्छेढुंगा, भगवती, अक्षेता, कलेजाबाङ, महतारे, चौरेलटोल, गलेश्वर, दशमुरे, मिलनचोक, सेतीपोखरा, रानीपौवा, तुसारेपानी, बैसरी, वखन, गौडा र भीरपाटालगायत क्षेत्रमा सडक विस्तार गरिएको छ ।

खेलकुदतर्फ रानीपौवा, मिलनचोक–दशमुरे, मौवाफाँट, चौरेलटोल, फूलबारी, कलेजाबाङ, अक्षेता तथा विभिन्न युवा क्लबका खेलमैदान निर्माण तथा विस्तार गरिएका छन् ।

शिक्षातर्फ विद्यालयका कक्षाकोठा, शौचालय, कम्प्युटर तथा अन्य पूर्वाधार निर्माण गरिएको छ । पिप्ले स्वास्थ्य ल्याब स्थापना, पातिकान्ला स्वास्थ्यचौकी निर्माण तथा सञ्चालनलगायतका काम भएका छन् ।

गाउँपालिकाको १४ रोपनी जग्गामा बहुउद्देश्यीय सभाहल तथा प्रशासनिक भवन निर्माण गरिएको छ । प्रहरी चौकीका लागि तीन रोपनी जग्गा व्यवस्थापन गरिएको छ ।

यसैगरी मौवाफाँट मगर समाज भवन, कोसेलीघर, आमा समूह भवन, विभिन्न मन्दिर तथा धार्मिक संरचना निर्माण र संरक्षण गरिएको छ । गलेश्वर पहिरो, तिल्किनी बस्ती तथा घाट संरक्षणका साथै घुमाउने ताल क्षेत्रमा कालीगण्डकी नदी नियन्त्रण गरी बस्ती संरक्षणको काम गरिएको छ ।

मुख्य सडकदेखि गाउँपालिका जाने सडक ढलान गरिएको छ भने पिप्लेमा रहेको ट्रेनिङ सेन्टरबाट वडा कार्यालय सञ्चालन गर्ने तयारी भइरहेको गाउँपालिकाले जनाएको छ ।

वडा नम्बर ४ : सडक विस्तार र तातोपानी कुण्ड संरक्षण

वडा नम्बर ४ दग्नाममा पनि पछिल्लो नौ वर्षमा सडक पूर्वाधार विस्तारलाई प्राथमिकता दिइएको छ । दोभान भीर–दर्मिजा तथा पानाकोट–कान्छिगाउँ सडक निर्माण गरिएको छ । कुम्भखोलादेखि नाइदेवी आमा समूह भवनसम्म सडक पुर्‍याइएको छ ।

वडाको महत्वपूर्ण पर्यटकीय सम्भावना बोकेको तातोपानी कुण्ड संरक्षण तथा पूर्वाधार विकासलाई समेत प्राथमिकतामा राखिएको गाउँपालिकाले जनाएको छ ।

रघुगंगा गाउँपालिकाले सडकसँगै शिक्षा, स्वास्थ्य, खानेपानी, पर्यटन, कृषि, विद्युत्, खेलकुद र सामाजिक पूर्वाधारमा गरिएको लगानीले स्थानीयको दैनिक जीवन सहज बनाउँदै लगेको दाबी गरेको छ । अब निर्माणाधीन योजनालाई समयमै सम्पन्न गरी ती पूर्वाधारलाई उत्पादन, रोजगारी र स्थानीय आयआर्जनसँग जोड्नु गाउँपालिकाका लागि मुख्य चुनौती देखिएको छ ।

Originally published on abcnews.com.np.