काठमाडौं । कलंकीस्थित स्युचाटारमा बिहीबार साँझ ‘द डिभाइन डान्स स्टुडियो’ सञ्चालनमा आएको छ। नायिका मिस पबीले रिबन काटेर स्टुडियोको औपचारिक उद्घाटन गरेकी हुन्।

उद्घाटनपछि मिस पबी स्टुडियोका प्रशिक्षार्थीसँगै जुम्बामा सहभागी भइन्। महिला तथा बालबालिकासहितको सहभागिता रहेको कार्यक्रममा उनको उपस्थितिले थप उत्साह थपेको थियो।

नायिका पबीले आफू पनि नियमित रूपमा जुम्बा गर्ने बताउँदै यसले शारीरिक तथा मानसिक स्वास्थ्यका लागि फाइदा पुग्ने बताइन्।

‘जुम्बा भनेको नाच मात्रै होइन, शरीरलाई सक्रिय राख्ने रमाइलो माध्यम पनि हो। म आफैँ पनि जुम्बा गरिरहेको छु। स्वास्थ्यका लागि पनि यो निकै राम्रो लाग्छ,’ उनले भनिन्।

स्वास्थ्यसँग जोड्दै नृत्य

स्टुडियोका सञ्चालक भरत बरालले सबै उमेर समूहलाई लक्षित गर्दै नृत्य र जुम्बामार्फत स्वास्थ्य तथा मनोरञ्जनलाई जोड्ने उद्देश्यले स्टुडियो सञ्चालनमा ल्याइएको बताए।

उनका अनुसार नृत्यलाई मनोरञ्जनमा मात्र सीमित नराखी स्वास्थ्य, शारीरिक सक्रियता र आत्मविश्वाससँग जोड्ने उद्देश्य रहेको छ।

स्टुडियोमा महिला, बालबालिका तथा अन्य उमेर समूहका लागि सहज वातावरणमा नृत्य र जुम्बा सिकाइने बरालले बताए। स्वस्थ जीवनशैलीप्रति आकर्षण बढाउने गरी विभिन्न कार्यक्रमसमेत सञ्चालन गरिने उनको भनाइ छ।

उद्घाटन समारोहमा मिस पबीले स्टुडियोका प्रशिक्षार्थीसँग जुम्बा गरेपछि कार्यक्रम थप आकर्षक बनेको थियो।

Originally published on abcnews.com.np.