काठमाडौं । चलचित्र ‘डियर काव्या’को औपचारिक घोषणा गरिएको छ। निर्माण टोलीले ३० फिट लामो पोस्टर सार्वजनिक गर्दै चलचित्र निर्माणको घोषणा गरेको हो।

चलचित्रमा उपासना सिंह ठकुरी र बिक्की समशेर खड्का मुख्य भूमिकामा रहनेछन्। बिक्कीका लागि ‘डियर काव्या’ डेब्यु चलचित्र हो। यसअघि उनी म्युजिक भिडियो तथा विज्ञापनमा देखिँदै आएका थिए।

सार्वजनिक पोस्टरमा उपासना र बिक्कीलाई रोमान्टिक अवतारमा प्रस्तुत गरिएको छ। बिक्कीको घाँटीमा रहेको गलबन्दी उपासनाले तानेर उनलाई आफूतिर नजिक ल्याएको दृश्य पोस्टरमा देखिन्छ।

पोस्टरको पृष्ठभूमिमा नेपालगन्ज सहर र कर्णाली पुलसमेत देखाइएको छ। यसले चलचित्रको कथा नेपालगन्ज तथा आसपासको क्षेत्रसँग जोडिएको हुनसक्ने संकेत गरेको छ।

मंसिरबाट छायांकन

श्रद्धा प्रसाईंले निर्देशन गर्ने चलचित्रको छायांकन आगामी मंसिरबाट सुरु हुने निर्माण पक्षले जनाएको छ। छायांकनका लागि आवश्यक तयारी पूरा भइसकेको पनि जनाइएको छ।

चलचित्रमा गौरी मल्ल, तृप्ति नाडकर, अनुप बराल, सन्तोष थापा र खड्गबहादुर पुन मगरलगायत कलाकारको समेत अभिनय रहनेछ।

निर्माण टोलीले मुख्य कलाकारसहित अनुभवी कलाकारहरूको सहभागिताले चलचित्रको कथालाई थप प्रभावकारी बनाउने विश्वास व्यक्त गरेको छ।

Originally published on abcnews.com.np.