पोखरा । प्रधानमन्त्री बालेन शाह शुक्रबार पोखरा आउन लागेका छन्। उनी स्थलमार्ग हुँदै पोखरा आउँदै गरेको बताइएको छ।

प्रधानमन्त्री शाह कास्कीको माछापुच्छ्रे गाउँपालिकास्थित धिताल अस्तामको अन्नपूर्ण इको भिलेजमा बस्ने तयारी गरिएको छ। प्रधानमन्त्रीका लागि उक्त लजका सबै कोठा बुक गरिएको स्रोतले जनाएको छ।

इको भिलेजमा एक रातमा करिब ६० जनासम्म बस्न सक्ने क्षमता रहेको छ। प्रधानमन्त्रीको मुस्ताङ भ्रमणको कार्यक्रम भने बिहीबार सार्वजनिक भएको थियो। यद्यपि, पोखरामा उनको अन्य कार्यक्रमबारे अहिलेसम्म औपचारिक जानकारी सार्वजनिक गरिएको छैन।

सुरक्षा निकायलाई औपचारिक जानकारी छैन

प्रधानमन्त्री पोखरा आउने तयारीबारे स्थानीय सुरक्षा निकायले भने औपचारिक जानकारी प्राप्त नभएको बताएका छन्।

कास्कीका प्रमुख जिल्ला अधिकारी कुमानसिं गुरुङले प्रधानमन्त्रीको आगमनबारे आफूले आधिकारिक रूपमा जानकारी नपाएको र सञ्चारमाध्यमबाट मात्रै खबर थाहा पाएको बताए।

यस्तै, इको भिलेजका सञ्चालक विश्वराज अधिकारीले पनि प्रधानमन्त्री बस्ने विषयमा आफूले सञ्चारमाध्यमबाट जानकारी पाएको बताएका छन्। उनले यसबारे आफूलाई थप जानकारी नभएको प्रतिक्रिया दिएका छन्।

प्रकृति र हिमशृङ्खलाको दृश्यावलोकन

अन्नपूर्ण इको भिलेज प्रकृति, ध्यान, परम्परा र आतिथ्यलाई केन्द्रमा राखेर सञ्चालन गरिएको लज हो। यहाँबाट अन्नपूर्ण, धौलागिरि र मनास्लुलगायत हिमशृङ्खलाको दृश्यावलोकन गर्न सकिन्छ।

प्रधानमन्त्री शाहको आगमनसँगै इको भिलेज आसपासको सुरक्षा व्यवस्थामा पनि विशेष ध्यान दिइने बताइएको छ।

Originally published on abcnews.com.np.