काठमाडौं । नागरिक लगानी कोषको कार्यकारी निर्देशकमा पर्वत कुमार कार्की दोस्रो कार्यकालका लागि पुनः नियुक्त भएका छन्। भदौ ३ गते बसेको मन्त्रिपरिषद् बैठकले कार्कीलाई कार्यकारी निर्देशकमा नियुक्त गर्ने निर्णय गरेको हो।

उदयपुरका स्थायी बासिन्दा कार्कीलाई नागरिक लगानी कोष ऐन, २०४७ को दफा ४२ को उपदफा (१) बमोजिम कार्यकारी निर्देशकमा नियुक्त गरिएको हो।

यसअघि नेपाल राष्ट्र बैंकका कार्यकारी निर्देशकबाट अवकाश पाएका कार्कीले २०८० माघ ३ गते खुला प्रतिस्पर्धाबाट नागरिक लगानी कोषको कार्यकारी निर्देशकको जिम्मेवारी पाएका थिए।

कार्कीले नेपाल राष्ट्र बैंकबाहेक **नेपाल ग्रामीण विकास बैंक र किसान लघुवित्त वित्तीय संस्था लिमिटेडमा प्रमुख कार्यकारी अधिकृत (सीईओ)**का रूपमा समेत काम गरिसकेका छन्।

शैक्षिक योग्यता र अनुभव

कार्कीले अस्ट्रेलियाको ग्रिफिथ विश्वविद्यालयबाट मास्टर अफ बैंकिङ एन्ड फाइनान्स (एमबीएफ) तथा त्रिभुवन विश्वविद्यालयबाट व्यवस्थापन विषयमा स्नातकोत्तर गरेका छन्।

केन्द्रीय बैंकिङ, वित्तीय स्थायित्व र वित्तीय बजार विश्लेषणलगायतका क्षेत्रमा उनले अन्तर्राष्ट्रियस्तरका विभिन्न तालिम तथा अनुभव हासिल गरेका छन्।

Originally published on abcnews.com.np.