काठमाडौं । निर्वाचन आयोगले मतदाता नामावलीमा रहेका व्यक्तिगत विवरण अद्यावधिक गर्न सबै मतदातासँग आग्रह गरेको छ। आयोगले असोज १ गते आफ्नो वेबसाइटमार्फत मतदाता नामावली सार्वजनिक गर्ने तयारी गरेको जनाएको छ।

आयोगका अनुसार प्रकाशित हुने मतदाता नामावलीमा नाम, थर, उमेर, ठेगानालगायतका विवरण सही र अद्यावधिक राख्न सम्बन्धित मतदाताको समेत महत्वपूर्ण भूमिका रहनेछ।

निर्वाचन आयोगका प्रवक्ता नारायणप्रसाद भट्टराईले आवश्यक परे सम्बन्धित निर्वाचन कार्यालय वा अनलाइन माध्यमबाट निवेदन दिई मतदाता विवरण सच्याउन आग्रह गरेका छन्।

यी विवरण सच्याउन सकिने

आयोगले मतदाता नामावलीमा रहेका विवरणमा त्रुटि भए सच्याउन तथा गलत विवरणका आधारमा नाम समावेश भएको जानकारी भए सूचना दिन आग्रह गरेको छ। विशेषगरी निम्न अवस्थामा अद्यावधिकका लागि निवेदन दिन सकिनेछ–

• नाम, थर, उमेर वा ठेगानामा त्रुटि भएमा,
• झुट्टा विवरणका आधारमा मतदाता नामावलीमा नाम समावेश भएको जानकारी भएमा,
• एउटै व्यक्तिको नाम एकभन्दा बढी स्थानमा समावेश भएमा,
• बसाइँसराइका कारण स्थायी ठेगाना परिवर्तन भएको भएमा,
• विवाहपछि स्थायी ठेगाना परिवर्तन भएको अवस्थामा नयाँ ठेगाना अद्यावधिक गर्नुपर्ने भएमा।

आयोगले एक व्यक्तिको नाम एकभन्दा बढी स्थानमा रहेको भए एउटा स्थानमा मात्र कायम गर्न पनि अनुरोध गरेको छ।

मतदाता नामावलीलाई यथार्थ, व्यवस्थित र अद्यावधिक बनाउन नागरिकको सक्रिय सहयोग आवश्यक रहेको आयोगले जनाएको छ। त्यसका लागि असोज १ गते सार्वजनिक हुने नामावली जाँच गरी आवश्यक परे समयमै सम्बन्धित निर्वाचन कार्यालय वा अनलाइन माध्यमबाट निवेदन दिन आयोगले आग्रह गरेको छ।

Originally published on abcnews.com.np.