काठमाडौं । अमेरिकाको अलास्का राज्यको दुर्गम क्षेत्रमा चार्टर विमान दुर्घटना हुँदा त्यसमा सवार सबै आठ जनाको मृत्यु भएको छ।

बिहीबार एन्करेजबाट करिब ७२५ किलोमिटर पश्चिममा रहेको केप न्युवेनहाम लङ रेन्ज राडार साइटनजिक सेस्ना ४४१ विमान दुर्घटनामा परेको हो।

अमेरिकाको फेडरल एभिएसन एडमिनिस्ट्रेसन (एफएए)का अनुसार विमान एन्करेजस्थित सिक्युरिटी एभिएसनले चार्टर गरेको थियो। विमान टेड स्टिभन्स अन्तर्राष्ट्रिय विमानस्थलबाट उडेर केप न्युवेनहामतर्फ गइरहेका बेला दुर्घटनामा परेको हो।

विमानमा दुई पाइलट र छ जना यात्रु सवार थिए। दुर्घटनामा सबैको मृत्यु भएको अधिकारीहरूले पुष्टि गरेका छन्।

अमेरिकी सेनाले दुर्घटनाप्रति दुःख व्यक्त गर्दै मृतकहरू महत्वपूर्ण जिम्मेवारी पूरा गरिरहेका समर्पित व्यक्ति रहेको जनाएको छ।

दुर्घटनाको कारण अनुसन्धान हुँदै

विमान दुर्घटनाको कारण तत्काल खुल्न सकेको छैन। एफएएले घटनाको विस्तृत अनुसन्धान सुरु गरेको जनाएको छ।

दुर्घटनाको कारणबारे थप विवरण अनुसन्धानपछि मात्रै सार्वजनिक हुने अपेक्षा गरिएको छ।

Originally published on abcnews.com.np.