काठमाडौं । लागुऔषध, ३० लाख रुपैयाँभन्दा बढी नगद र सुनका गरगहनासहित पक्राउ परेका कुमार लामाविरुद्ध लागुऔषध कारोबारसँगै सम्पत्ति शुद्धीकरणको मुद्दा दर्ता भएको छ।

सिन्धुपाल्चोकको चौतारा साँगाचोकगढी नगरपालिका–८ घर भई काठमाडौं महानगरपालिका–१५, स्वयम्भू बुद्धपार्कमा बस्दै आएका ४२ वर्षीय लामालाई प्रहरीले गत जेठ ११ गते पक्राउ गरेको थियो। जिल्ला सरकारी वकिल कार्यालयले प्रहरी अनुसन्धान प्रतिवेदनका आधारमा भदौ ३ गते उनीविरुद्ध अदालतमा मुद्दा दर्ता गरेको हो।

प्रहरी वृत्त स्वयम्भूबाट खटिएको टोलीले लामालाई पक्राउ गर्दा १२२ ग्राम खैरो हेरोइन, नाइट्राभेटका १०५ ट्याबलेट, डाइजापामका २५ एम्पुल, फिनार्गनका २५ एम्पुल, तीन थान डिजिटल तराजु तथा ३० लाख १७ हजार रुपैयाँ नगद बरामद गरेको जनाएको छ। उनको साथबाट विभिन्न सुनका गरगहनासमेत फेला परेका थिए।

तेस्रो पटक लागुऔषध मुद्दामा पक्राउ

प्रहरी अनुसन्धानअनुसार लागुऔषध कारोबारको आरोपमा लामा यसअघि पनि दुई पटक पक्राउ परिसकेका थिए। यसअघिका मुद्दामा उनले गरी करिब आठ वर्ष जेल सजाय भुक्तान गरेको अनुसन्धानबाट खुलेको प्रहरीले जनाएको छ।

पटक–पटक कारबाहीमा परे पनि उनी पुनः लागुऔषध कारोबारमा संलग्न भएको प्रहरीको निष्कर्ष छ। यसपटक ठूलो परिमाणमा लागुऔषध, नगद र अन्य सम्पत्ति फेला परेपछि प्रहरीले उनको आर्थिक कारोबारमाथि समेत विस्तृत अनुसन्धान अघि बढाएको थियो।

३० लाख नगदको स्रोत खुलाउन नसकेको प्रहरीको दाबी

पक्राउका क्रममा कोठाबाट बरामद भएको ३० लाख १७ हजार रुपैयाँ नगद तथा सुनका गरगहनाको स्रोतबारे प्रहरीले लामासँग सोधपुछ गरेको थियो। तर, उनले ती सम्पत्तिको वैध आम्दानीको स्रोत पुष्टि गर्न नसकेको अनुसन्धानमा उल्लेख छ।

प्रहरीका अनुसार पक्राउ परेकै दिन लामाको माछापुच्छ्रे बैंकस्थित खातामा १२ लाख ५१ हजार ४७७ रुपैयाँ मौज्दात रहेको पनि फेला परेको थियो। उक्त रकमको स्रोतसमेत स्पष्ट हुन नसकेपछि अनुसन्धान सम्पत्ति शुद्धीकरणतर्फ केन्द्रित गरिएको हो।

आमाको बैंक खातामाथि पनि अनुसन्धान

अनुसन्धानका क्रममा प्रहरीले लामाकी आमा ओमकुमारी तामाङको बैंक कारोबारसमेत अध्ययन गरेको जनाएको छ। उनको खातामा ४६ लाख रुपैयाँ रहेको र कुमार लामा पक्राउ परेपछि उक्त रकम अर्को व्यक्तिको खातामा स्थानान्तरण गरिएको प्रहरी अनुसन्धानमा उल्लेख छ।

प्रहरीले कुमार लामा र उनको परिवारसँग सम्बन्धित आर्थिक कारोबारको अनुसन्धानपछि लागुऔषध कारोबारबाट आर्जित रकमलाई विभिन्न माध्यमबाट वैधानिक देखाउने प्रयास भएको आशंकामा सम्पत्ति शुद्धीकरणतर्फ पनि मुद्दा अघि बढाएको हो।

एक करोड १५ लाखभन्दा बढीको अवैध सम्पत्ति जोडेको आरोप

प्रहरी अनुसन्धानअनुसार लामाले लागुऔषध कारोबारबाट प्राप्त रकममार्फत विभिन्न कम्पनीका सेयर, सुन तथा नगद गरी एक करोड १५ लाख ९२ हजार ६ सय रुपैयाँ बराबरको सम्पत्ति आर्जन गरेको आरोप छ।

सरकारी वकिल कार्यालयले उनीविरुद्ध लागुऔषध कारोबारको कसुरमा कानुनबमोजिम कारबाहीको माग गर्दै मुद्दा दायर गरेको छ। अभियोग पुष्टि भएमा उनलाई १५ वर्षसम्म कैद सजाय हुन सक्ने मागदाबी गरिएको छ। साथै, सम्पत्ति शुद्धीकरणसम्बन्धी कसुरमा अनुसन्धानबाट गैरकानुनी ठहरिएको सम्पत्ति जफत गर्नसमेत माग गरिएको छ।

Originally published on abcnews.com.np.