काठमाडौं । कोसी प्रदेशका मुख्यमन्त्री हिक्मतकुमार कार्कीले सोमबार प्रदेशसभाबाट विश्वासको मत लिने भएका छन्।
मुख्यमन्त्री तथा मन्त्रिपरिषद्को कार्यालयले शुक्रबार कोसी प्रदेशसभा सचिवालयलाई विश्वासको मत लिनेसम्बन्धी जानकारी गराएको हो। सोमबार नै मन्त्रिपरिषद् हेरफेर गरेका मुख्यमन्त्री कार्कीले त्यसै दिन विश्वासको मत लिने तयारी गरेका हुन्।
नेकपा र नेकपा एमालेबीचको सत्ता समीकरणअनुसार प्रदेश सरकारमा हेरफेर भएपछि मुख्यमन्त्री कार्कीले विश्वासको मत लिन लागेका हुन्। नेपाली कांग्रेसले सरकारलाई दिएको समर्थन फिर्ता लिनुअघिसम्म भने कार्कीले तत्काल विश्वासको मत नलिने धारणा राख्दै आएका थिए।
नेकपाका १७ जना सांसद सरकारमा सहभागी भएपछि मुख्यमन्त्री कार्कीले विश्वासको मत लिने प्रक्रिया अघि बढाएका हुन्। हाल कोसी प्रदेश सरकारलाई एमालेका ४० र नेकपाका १७ गरी ५७ जना प्रदेशसभा सदस्यको समर्थन रहेको छ।
कोसी प्रदेशको वर्तमान सरकार नेपालको संविधानको धारा १६८ को उपधारा (५) बमोजिम गठन भएको हो।
३० दिनभित्र विश्वासको मत लिनुपर्ने
मुख्यमन्त्री कार्कीले मन्त्रिपरिषद् हेरफेरलगत्तै विश्वासको मत लिने प्रक्रिया अघि बढाएका छन्। प्रदेशसभा सचिवालयमा दर्ता गरिएको सूचनाअनुसार सोमबार बस्ने प्रदेशसभा बैठकमा उनले विश्वासको मतका लागि प्रस्ताव पेस गर्नेछन्।
संविधानको धारा १६८ को उपधारा (५) बमोजिम नियुक्त मुख्यमन्त्रीले नियुक्त भएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ। सोही व्यवस्थाअनुसार कार्कीले सोमबार विश्वासको मत लिन लागेका हुन्।
Originally published on abcnews.com.np.
प्रतिक्रिया दिनुहोस्