काठमाडौं । नेपाल जनप्रशासन संघले सार्वजनिक प्रशासन, व्यवस्थापन तथा सार्वजनिक सेवाको क्षेत्रमा विशिष्ट योगदान पुर्याएका डा रामकण्ठ माकजू श्रेष्ठ र पूर्वअर्थसचिव रामेश्वरप्रसाद खनाललाई ‘हेमबहादुर मल्ल सम्मान’ प्रदान गर्ने निर्णय गरेको छ।
संघले विसं २०८१ को सम्मान धुलिखेल अस्पतालका कार्यकारी निर्देशक डा रामकण्ठ माकजू श्रेष्ठ र विसं २०८२ को सम्मान पूर्वअर्थसचिव रामेश्वरप्रसाद खनाललाई प्रदान गर्ने निर्णय गरेको हो। संघका अध्यक्ष मधुरमण आचार्यले शुक्रबार पत्रकार सम्मेलनमार्फत दुई वर्षको सम्मान एकैपटक घोषणा गरिएको जानकारी दिए।
संघका अनुसार विभिन्न कारणले २०८१ र २०८२ सालको सम्मान एकैपटक घोषणा गरिएको हो।
विसं २०८१ का लागि छनोट भएका डा माकजूले धुलिखेल अस्पतालको स्थापना तथा सञ्चालनमार्फत गुणस्तरीय स्वास्थ्य सेवा प्रवाहमा महत्वपूर्ण योगदान पुर्याएका छन्। उनको नेतृत्वमा स्वास्थ्य सेवाको प्रभावकारिता, संस्थागत विकास तथा नागरिकप्रतिको उत्तरदायित्व सुदृढ भएको संघले जनाएको छ।
त्यस्तै, विसं २०८२ को सम्मानका लागि छनोट भएका खनालले सार्वजनिक प्रशासन, नीति निर्माण तथा सार्वजनिक सेवाको स्तरवृद्धिमा विशिष्ट भूमिका निर्वाह गरेको संघको ठहर छ। सार्वजनिक पदमा रहँदा उनले जिम्मेवारी कुशलतापूर्वक निर्वाह गर्नुका साथै प्रशासन सुधारका क्षेत्रमा महत्वपूर्ण योगदान पुर्याएको भन्दै सम्मानका लागि छनोट गरिएको हो।
सम्मानका लागि उम्मेदवार छनोट गर्न नेपाल सरकारका पूर्वसचिव एवं संघका पूर्वअध्यक्ष कृष्ण ज्ञवालीको संयोजकत्वमा उच्चस्तरीय छनोट समिति गठन गरिएको थियो। समितिले करिब तीन महिनाको अध्ययनपछि निश्चित मापदण्डका आधारमा गरेको सिफारिसलाई संघको कार्यसमितिले अनुमोदन गरेको हो।
छनोट प्रक्रियामा सार्वजनिक सेवाप्रतिको प्रतिबद्धता, संस्थागत नेतृत्व तथा जनसरोकारका क्षेत्रमा पुर्याएको प्रभावलाई प्राथमिकता दिइएको संघले जनाएको छ।
साल्ट ट्रेडिङ कर्पोरेसन लिमिटेडसँगको साझेदारीमा नेपाल जनप्रशासन संघले विसं २०५९ मा ‘हेमबहादुर मल्ल सम्मान’ स्थापना गरेको हो। विसं २०६० देखि प्रदान गरिँदै आएको सम्मानमा २ लाख रुपैयाँ नगद र सम्मानपत्र प्रदान गरिन्छ।
साल्ट ट्रेडिङ कर्पोरेसनका तत्कालीन नेतृत्वकर्ता एवं कुशल व्यवस्थापक स्वर्गीय हेमबहादुर मल्लको स्मृतिमा स्थापित सम्मान सार्वजनिक सेवामा व्यावसायिकता, पारदर्शिता र उत्तरदायित्व प्रवर्द्धन गर्ने उद्देश्यले प्रदान गरिँदै आएको संघका अध्यक्ष आचार्यले बताए।
Originally published on abcnews.com.np.
प्रतिक्रिया दिनुहोस्