काठमाडौँ । नेपाली कांग्रेसका सभापति गगन थापाले पार्टीभित्रको आन्तरिक विवाद अदालतको सहारा नलिई जनताकै बीचमा बसेर राजनीतिक रूपमा समाधान गर्नुपर्ने बताएका छन्।

बाह्रखरीसँगको कुराकानीमा थापाले विशेष महाधिवेशनको वैधानिकतासम्बन्धी विवाद अदालतसम्म पुगेकोप्रति दुःख व्यक्त गर्दै पार्टीभित्रका समस्या राजनीतिक संवाद र छलफलबाटै समाधान गर्नुपर्ने बताए।

उनले वैशाख ४ गते अदालतले विशेष महाधिवेशन वैधानिक भएको फैसला गरेपछि सोहीअनुसार अघि बढ्ने सोच बनाएको बताए। तर, पुनः उस्तै विवाद दोहोरिएपछि समस्या थप जटिल बनेको उनको भनाइ छ।

थापाले आफू विशेष महाधिवेशनबाट सभापति बनेको भन्दै कुनै व्यक्तिगत माग नरहेको पनि स्पष्ट पारे। पार्टीको विधि र प्रक्रियाअनुसार महाधिवेशन सम्पन्न गर्नु नै आफ्नो प्राथमिकता रहेको उनको भनाइ छ।

असन्तुष्ट पक्षसँग संवादको प्रयास

असन्तुष्ट पक्ष अदालत पुगेपछि पनि आफूले संवादको प्रयास जारी राखेको थापाले बताए। उनका अनुसार वैशाख ६ गतेदेखि उनले कार्यवाहक अध्यक्ष पूर्णबहादुर खड्का, नेता शेखर कोइराला, शशांक कोइरालालगायत अधिकांश नेतासँग छुट्टाछुट्टै छलफल गरेका छन्।

तर, असन्तुष्ट पक्षले अदालतको निर्णय नआएसम्म संवादमा बस्न आनाकानी गरिरहेको उनले बताए।

थापाले भदौ २४ गतेदेखि सुरु हुने वडा अधिवेशन कांग्रेसको संगठनात्मक प्रक्रियाको महत्वपूर्ण चरण भएको उल्लेख गर्दै अधिवेशन निष्पक्ष भए–नभएको विषयमा प्रश्न उठाउन सकिने तर प्रक्रियालाई नै अवरुद्ध गर्न नहुने बताए।

निर्वाचन आयोगको निर्णयअनुसार अधिवेशन प्रक्रिया अघि बढाउनुपर्नेमा जोड दिँदै उनले असन्तुष्ट पक्षलाई अधिवेशन निष्पक्ष भए–नभएको हेर्न आग्रह गरे।

असन्तुष्ट पक्षको भेलालाई स्वाभाविक प्रक्रिया माने

कांग्रेसको असन्तुष्ट पक्षले आयोजना गरेको राष्ट्रिय भेलालाई थापाले पार्टीभित्रको विचार आदानप्रदानको स्वाभाविक प्रक्रिया भएको बताएका छन्।

उनले यस्ता भेलाबाट पार्टीभित्र विभिन्न मतहरू आउन सक्ने भए पनि त्यसको वैधानिक हैसियत भने नहुने स्पष्ट पारे। भेलामा उठेका विषय आफूले सुनेको तर त्यहाँ व्यक्त धारणामा समेत एकरूपता नरहेको उनले बताए।

भेलामा सहभागी नेताहरूले पार्टीको समस्या सभापति थापामै रहेको निष्कर्ष निकालेको विषयमा प्रतिक्रिया दिँदै उनले आफूविरुद्ध गरिएको आलोचना, अपमान र निन्दालाई स्वीकार नगर्ने बताए।

उनले गौतम बुद्धको उदाहरण दिँदै नकारात्मक टिप्पणीलाई बेवास्ता गरेर पार्टीको काममा केन्द्रित हुनुपर्ने धारणा राखे।

भदौ २४ देखि वडा अधिवेशन

सभापति थापाले कांग्रेसको वडा अधिवेशन भदौ २४ गतेदेखि सुरु हुने जानकारी दिँदै महाधिवेशनको तयारी अघि बढिरहेको बताए।

पार्टीभित्र एकता कायम गर्न आफूले निरन्तर प्रयास गरिरहेको र आगामी महाधिवेशनलाई निष्पक्ष बनाउन तयार रहेको उनको भनाइ छ।

असन्तुष्ट पक्ष अदालत पुगेका कारण संवाद प्रक्रिया प्रभावित भए पनि आफूले संवादको ढोका बन्द नगरेको थापाले बताए। पार्टीभित्रका विवाद अदालतबाट नभई राजनीतिक संवाद र कार्यकर्तामाझ बसेर समाधान गर्नुपर्नेमा उनले जोड दिएका छन्।

Originally published on abcnews.com.np.