मुम्बई । बलिउड अभिनेता गोविन्दा र उनकी श्रीमती सुनिता आहुजाबीचको विवादले नयाँ मोड लिएको छ। हालै गोविन्दाविरुद्ध दायर गरेको डिभोर्सको मुद्दा फिर्ता लिएकी सुनिताले मोडल राखी सावन्तसँग फोनमा कुराकानी गर्दै गोविन्दा र अभिनेत्री कोमल रानी स्वर्णकार विवाह गर्ने तयारीमा रहेको दाबी गरेकी छन्।

गोविन्दा–सुनिता विवादमा राखीले सुनिताको पक्षमा बोल्दै आएकी छन्। यही क्रममा उनीहरूबीच निकटता बढेको बताइएको छ। मिडियासामु सुनितासँग फोनमा कुराकानी गर्दै राखीले डिभोर्सको मुद्दा फिर्ता लिएर सुनिताले सही निर्णय गरेको बताइन्।

राखीले गोविन्दासँग रहेको भनिएको करिब २०० करोड भारुको सम्पत्ति जोगाउन सुनितालाई सुझाव दिएकी छन्। यदि गोविन्दाको जीवनमा अर्को महिला आए सम्पत्तिमा बाँडफाँट हुन सक्ने भन्दै उनले सम्पत्ति आफ्नो नाममा सुरक्षित गर्नसमेत सुझाएकी हुन्।

मुम्बईमा सञ्चारकर्मीहरूसँग कुरा गर्ने क्रममा राखीले सुनितालाई फोन गरी लाउडस्पिकरमा राखेकी थिइन्।

कुराकानीका क्रममा सुनिताले आफूले डिभोर्सको मुद्दा फिर्ता लिनुको कारण गोविन्दा र कोमल विवाह गर्ने तयारीमा रहेको बताइन्। त्यसपछि राखीले मुद्दा फिर्ता लिएर राम्रो गरेको भन्दै सम्पत्तिमा ध्यान दिन सुझाइन्।

फोन संवादपछि सुनिताले ‘घरकी श्रीमती कहिल्यै गलत हुँदिनन्’ भन्दै आफू सुनिताको पक्षमा रहेको बताइन्।

यसअघि गत १९ अगस्टमा सुनिता आफ्ना छोरा यशवर्धनसँग बान्द्रास्थित पारिवारिक अदालत पुगेकी थिइन्। केही समयअघि उनले गोविन्दालाई ‘सुगर ड्याडी’ भन्दै टिप्पणी गरेकी थिइन्। गोविन्दा र कोमललाई विमानस्थलमा सँगै देखेपछि सुनिता आक्रोशित बनेको बताइएको थियो।

त्यसपछि गोविन्दाले पनि कसैको बदनाम नगर्न सुनितालाई आग्रह गरेका थिए।

यसैबीच व्यक्तिगत विवादका बीच गोविन्दा करिब सात वर्षपछि फिल्म ‘रुपा’मार्फत ठूलो पर्दामा फर्किँदैछन्। फिल्ममा कोमल पनि मुख्य भूमिकामा रहेकी छन् भने फिल्मका निर्माता गोविन्दा स्वयं हुन्।

Originally published on abcnews.com.np.