शनिबार भक्तपुरको नगरकोटमा सुरु भएको एमालेको ‘जनसंगठन समन्वय संयन्त्र कार्यशाला’लाई सम्बोधन गर्दै ओलीले वर्तमान सरकार विदेशी शक्तिको आडमा चलेको आरोप लगाए।

‘यो कुन शक्तिको आडभरोसामा चलेको छ मतलब छैन। यी तत्त्वहरूसँग हामी डराउँदैनौँ, डराउनुहुन्न,’ उनले भने।

ओलीले हालैको निर्वाचनमा बहुमत हासिल गर्न विभिन्न तरिका अपनाइएको आरोप लगाए। ‘हाटहुट, लाटलुट, जनतालाई तर्साएर, थर्काएर, बोल्न नसक्ने बनाएर, जेसुकै गरेर, बाकस साटेर ल्याएर, बहुमत ल्याएको देखाइयो,’ उनले भने, ‘यो सरकार पाँच वर्ष कुनै हालतमा टिक्दैन।’

लोकतन्त्र पुनःस्थापनाको दाबी

अध्यक्ष ओलीले वर्तमान सरकारले संविधान मिचेको आरोप लगाउँदै लोकतन्त्र पुनःस्थापित गर्नुपर्ने बताए।

‘लोकतन्त्र अपहरित भएको छ, संविधान मिचिएको छ। अपहरित लोकतन्त्रलाई फेरि फिर्ता ल्याउनुछ,’ उनले भने।

उनले सरकार र समर्थकहरूले समाजमा त्रासको वातावरण सिर्जना गरिरहेको आरोपसमेत लगाए। सामाजिक सञ्जालमा सरकारको आलोचना वा सत्य कुरा राख्नेहरूलाई समूह बनाएर आक्रमण गर्ने गरिएको उनको दाबी छ।

‘हरेकको मनमा त्रास छ। एउटा स्टाटस लेख्नुस् त कति गाली आउँछ, त्रास छ,’ ओलीले भने, ‘सही स्टाटस लेख्नुस्, सही कुरा बोल्नै हुँदैन। हुल्याहाहरूको आक्रमण सुरु भइहाल्छ।’

ओलीले जनताको पक्षमा आवाज उठाउन र सत्य कुरा बोल्न नडराउन पार्टीका नेता तथा कार्यकर्तालाई आग्रह गरे।

एमाले बागमती प्रदेश जनसम्पर्क समन्वय संयन्त्रले आयोजना गरेको कार्यशाला दुई दिनसम्म सञ्चालन हुनेछ।