काठमाडौं । नेकपा एमालेका अध्यक्ष केपी शर्मा ओलीले वर्तमान सरकारमाथि कडा टिप्पणी गर्दै सरकारलाई ‘बारुला’को संज्ञा दिएका छन्। शनिबार नगरकोटमा आयोजित एक कार्यक्रमलाई सम्बोधन गर्दै उनले वर्तमान सरकारलाई मुलुकको जिम्मेवारी सुम्पेर बस्न नसकिने बताएका हुन्।

अध्यक्ष ओलीले बालेन नेतृत्वको सरकार बनेपछि आफूलाई गिरफ्तार गरिएको प्रसंगसमेत उठाए। आफूलाई पक्राउ गरेर अरूलाई त्रसित पार्ने प्रयास गरिएको उनको आरोप थियो।

“अरूलाई तर्साउनका लागि केपी ओलीलाई समातेर थुनियो, केपी ओलीलाई थुनियो भनेर अरूलाई थर्कमान बनाउन खोजियो,” ओलीले भने।

उनले वर्तमान सरकारको गतिविधिप्रति व्यंग्य गर्दै डर र त्रासको वातावरण सिर्जना गरेर लामो समयसम्म मुलुक सञ्चालन गर्न नसकिने जिकिर गरे।

“यी बारुलाहरूसँग डराएर सधैँ यिनीहरूका जिम्मामा देश लगाउन सकिँदैन,” उनले भने।

निजी क्षेत्रलाई त्रसित बनाएको आरोप

ओलीले सरकारले निजी क्षेत्रमाथि दबाब र त्रास सिर्जना गरिरहेको आरोपसमेत लगाए। सम्पत्ति जफत गर्ने, बैंक खाता रोक्का गर्ने जस्ता गतिविधिमार्फत निजी क्षेत्रलाई आतंकित बनाउने प्रयास भइरहेको उनको दाबी थियो।

यस्ता गतिविधिले मुलुकको आर्थिक वातावरण थप बिग्रन सक्ने भन्दै ओलीले सरकारले आर्थिक क्षेत्रलाई अस्थिरतातर्फ धकेलिरहेको आरोप लगाए। निजी क्षेत्रलाई प्रोत्साहन र विश्वासको वातावरण दिनुपर्नेमा उल्टै त्रसित बनाउने काम भइरहेको उनको भनाइ थियो।

‘एकछिन दुख्ने हो’ भन्दै व्यंग्य

सम्बोधनका क्रममा ओलीले ‘बारुला’को उदाहरण दिँदै वर्तमान सरकारप्रति व्यंग्यात्मक टिप्पणी गरे। उनका अनुसार बारुला एक ठाउँमा कराए वा झम्टिए पनि त्यसबाट स्थायी रूपमा डराउनुपर्ने अवस्था हुँदैन।

“एउटा छिन दुख्ने हो,” उनले व्यंग्यात्मक शैलीमा भने।

ओलीको यो अभिव्यक्तिलाई वर्तमान सरकार र त्यसका गतिविधिप्रति एमाले अध्यक्षको पछिल्लो राजनीतिक कटाक्षका रूपमा हेरिएको छ।

Originally published on abcnews.com.np.