काठमाडौँ । नेपाली कम्युनिस्ट पार्टी (नेकपा) का नेता झलनाथ खनालले पार्टीलाई नयाँ ढङ्गले पुनर्गठन र रूपान्तरण गर्नुपर्ने बताएका छन्। पुरानै ढाँचा र शैलीबाट पार्टी सञ्चालन हुन नसक्ने भन्दै उनले पुनर्गठन र रूपान्तरणलाई अनिवार्य आवश्यकता भएको बताएका हुन्।

नेकपा कोशी प्रदेश सम्पर्क समितिले शनिबार काठमाडौँमा आयोजना गरेको कार्यक्रममा बोल्दै खनालले अग्रज नेताहरूले पद ओगटेर बस्नुभन्दा नीति निर्माण, सल्लाह–सुझाव र कार्यकर्ता प्रशिक्षणमा केन्द्रित हुनुपर्ने धारणा राखे।

युवा कार्यकर्ताले पनि केवल अग्रज नेताका उपदेश सुन्ने भूमिकामा सीमित नभई नेतृत्व गर्ने आँट, हिम्मत र सिर्जनशीलताका साथ पार्टीको अग्रमोर्चा सम्हाल्न अघि बढ्नुपर्ने उनले बताए।

खनालले समाजवादका नाममा अमूर्त व्याख्या मात्र गरेर नहुने भन्दै नेपाली विशेषताको वैज्ञानिक समाजवाद कस्तो हुने भन्ने स्पष्ट र ठोस कार्यक्रम जनतासामु प्रस्तुत गर्नुपर्नेमा जोड दिए।

उनले मुलुक अहिले गम्भीर राजनीतिक सङ्कटबाट गुज्रिरहेको र प्रतिक्रियावादी शक्तिहरू विभिन्न रूपमा सक्रिय भइरहेको दाबी गरे। यस्तो अवस्थामा कम्युनिस्ट आन्दोलनलाई थप सुदृढ र प्रभावकारी बनाउन पार्टीभित्रै संरचनात्मक परिवर्तन आवश्यक रहेको उनको भनाइ थियो।

पुराना दल दिशाहीन भए : खनाल

खनालले अहिलेको अवस्थामा पुराना दलहरू एकताबद्ध भएर अघि बढ्नुपर्ने भए पनि उनीहरू दिशाहीन बन्दै गएको टिप्पणी गरे।

नेपाली कांग्रेस अझै दुई चिरामा विभाजित रहेको भन्दै उनले एकताबद्ध भएर मुलुकलाई ठोस राजनीतिक निकास दिन सक्ने अवस्थामा कांग्रेस नरहेको दाबी गरे।

त्यस्तै, नेकपा एमालेभित्र पनि बहुमत पङ्क्ति पार्टी रूपान्तरणको पक्षमा पुगिसकेको खनालले दाबी गरे। उनले वर्तमान राजनीतिक परिस्थितिको सामना गर्न पुरानो सोच र कार्यशैलीबाट बाहिर निस्केर नयाँ पुस्तालाई नेतृत्वमा अघि बढाउनुपर्नेमा जोड दिए।

Originally published on abcnews.com.np.