चितवन । चितवनको खैरहनीमा शनिबार भएको सवारी दुर्घटनामा मृत्यु भएका दुईजना सहोदर दिदीभाइ रहेको खुलेको छ। पश्चिम चितवनमा बसले मोटरसाइकललाई ठक्कर दिँदा उनीहरूको मृत्यु भएको हो।

प्रहरीका अनुसार खैरहनी नगरपालिका–१ स्थित तरकारी चोक नजिक नारायणगढबाट बर्दिबासतर्फ जाँदै गरेको बा.प्र. ०३–००१ ख २७७३ नम्बरको बसले विपरीत दिशाबाट आउँदै गरेको बा.प्र. ०१–०१५ प ३३८५ नम्बरको मोटरसाइकललाई ठक्कर दिएको थियो।

दुर्घटनामा सर्लाहीको ब्रह्मपुरी गाउँपालिका–४ निवासी २३ वर्षीय महेबुब रजा र महोत्तरीको गौशाला नगरपालिका–५ निवासी अजिमा प्रविनको मृत्यु भएको जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले जानकारी दिए।

दुवै सहोदर दिदीभाइ रहेको पुष्टि भएको प्रहरीले जनाएको छ। मृतकद्वयका बुबा शेष अख्तर हुसेनले शवको सनाखत गरेका छन्।

दुर्घटनामा गम्भीर घाइते भएका उनीहरूलाई उपचारका लागि भरतपुरस्थित नयाँ मेडिकल कलेज लगिएको थियो। उपचारका क्रममा दुवैको मृत्यु भएको प्रहरीले जनाएको छ। दुर्घटनापछि तत्काल सनाखत हुन सकेको थिएन।

बस चालक नियन्त्रणमा

दुर्घटनापछि प्रहरीले बस चालक सर्लाहीको हरिवन नगरपालिका–८ का ५१ वर्षीय अजयकुमार मास्केलाई नियन्त्रणमा लिएको छ।

घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।

Originally published on abcnews.com.np.