काठमाडौं । काठमाडौंको शंखमुलस्थित भ्याली ब्वाइज होस्टलमा २२ वर्षीय छोरा वसन्त कालाथोकीको हत्या भएको खबरपछि दाङमा उनकी आमाको पनि मृत्यु भएको छ।

जिल्ला प्रहरी कार्यालय दाङका डीएसपी डा. हेम केसीका अनुसार वसन्तकी ३८ वर्षीया आमा बिना कालाथोकी घरमै मृत अवस्थामा भेटिएकी हुन्।

‘छोराको हत्या भएको खबर पाउने क्रममा आमाले आत्महत्या गरेको अनुमान हामीले गरेका छौँ। उनका श्रीमान् वैदेशिक रोजगारीका सिलसिलामा मलेसियामा रहेछन्। काठमाडौंमा छोराको हत्या भएको खबर पाएलगत्तै आमाले सिलिङ फ्यानमा पासो लगाएर झुन्डिएको अवस्थामा शव फेला परेको हो,’ केसीले भने।

उनका अनुसार बिना कालाथोकीको शव पोस्टमार्टमका लागि राप्ती स्वास्थ्य विज्ञान प्रतिष्ठानमा राखिएको छ।

होस्टलमा भएको कुटपिटमा छोराको मृत्यु

जिल्ला प्रहरी परिसर काठमाडौंका अनुसार गत शुक्रबार शंखमुलस्थित भ्याली ब्वाइज होस्टलमा तीन युवकबीच कुटपिट हुँदा वसन्त गम्भीर घाइते भएका थिए।

घटनामा बाराको कलैया उपमहानगरपालिका–३ का १८ वर्षीय शेखर यादव र २० वर्षीय प्रमित पटेल संलग्न रहेको आरोप छ। गम्भीर घाइते वसन्तलाई उपचारका लागि मिनभवनस्थित निजामती कर्मचारी अस्पताल लगिएको थियो। उपचारकै क्रममा उनको मृत्यु भएको प्रहरीले जनाएको छ।

कुटपिटमा संलग्न रहेको आरोपमा शेखर यादवलाई प्रहरीले पक्राउ गरिसकेको छ। अर्का आरोपित प्रमित पटेल भने फरार रहेका छन्। उनको खोजी भइरहेको प्रहरीले जनाएको छ।

Originally published on abcnews.com.np.