काठमाडौँ । नेपाल र भारतका चार जिल्लाका सुरक्षा अधिकारीले सीमा सुरक्षालाई थप प्रभावकारी बनाउन संयुक्त गस्तीको क्षेत्र विस्तार गर्ने सहमति गरेका छन्। साथै, सीमा अपराधसम्बन्धी सूचना नियमित रूपमा आदानप्रदान गर्ने निर्णयसमेत भएको छ।

महोत्तरीको जलेश्वरमा शनिबार सम्पन्न नेपाल–भारत सुरक्षा अधिकारीको समन्वयात्मक बैठकमा हातहतियार तथा लागुऔषध ओसारपसार, मानव तस्करीलगायत सीमा अपराधको नियन्त्रण तथा रोकथाम, सीमा स्तम्भको सुरक्षा र मर्मतसम्भारलगायत विषयमा छलफल भएको थियो।

महोत्तरीका सहायक प्रमुख जिल्ला अधिकारी सञ्जयकुमार पोखरेलका अनुसार सीमा क्षेत्रमा दुवै देशका सुरक्षाकर्मीले गर्दै आएको संयुक्त गस्तीलाई थप विस्तार गर्ने विषयमा सहमति भएको हो।

उनका अनुसार सीमा क्षेत्रमा हुने आपराधिक गतिविधि नियन्त्रणका लागि घटनासँग सम्बन्धित सूचना एकअर्कासँग नियमित रूपमा आदानप्रदान गर्ने सहमति पनि भएको छ। बैठक पारस्परिक समन्वय, सहकार्य र सीमा सुरक्षालाई प्रभावकारी बनाउने विषयमा केन्द्रित रहेको उनले बताए।

बैठकमा सहभागी अधिकारी

बैठकमा महोत्तरीका प्रमुख जिल्ला अधिकारी इन्द्रदेव यादव, सर्लाहीका प्रमुख जिल्ला अधिकारी विजयराज सुवेदी, रौतहटका प्रमुख जिल्ला अधिकारी दिनेश सागर, भारतको सीतामढीका जिल्ला मजिस्ट्रेट तनय सुलतानिया र सीतामढीका प्रहरी उपरीक्षक अमित रञ्जनसहित दुवै देशका सुरक्षा अधिकारीहरूको सहभागिता थियो।

Originally published on abcnews.com.np.