काठमाडौं, ७ भदौ । पाकिस्तानमा आगामी चैत तेस्रो साता १४औँ दक्षिण एसियाली खेलकुद (साग) आयोजना हुने भएको छ।

पाकिस्तानको इस्लामाबादमा बसेको दक्षिण एसियाली ओलम्पिक काउन्सिल (एसएओसी) को बैठकले २०८३ साल चैत २० देखि २८ गतेसम्म साग आयोजना गर्ने निर्णय गरेको हो।

पाकिस्तानमा हुने सागमा २८ खेल समावेश गरिने भएको छ। प्रतियोगितामा आयोजक पाकिस्तानसहित नेपाल, बंगलादेश, भुटान, भारत, माल्दिभ्स र श्रीलंकाले सहभागिता जनाउनेछन्।

हरेक चार वर्षमा आयोजना हुने साग पछिल्लो पटक सन् २०१९ मा नेपालमा भएको थियो। नेपालपछि पाकिस्तानले आयोजना गर्ने निर्णय भए पनि भारत र पाकिस्तानबीचको राजनीतिक तनावका कारण प्रतियोगिता निर्धारित समयमा हुन सकेको थिएन।

अब पाकिस्तानले आयोजना गर्ने १४औँ सागको तयारी अघि बढाइएको हो। साग आयोजनासम्बन्धी तयारी बैठकमा नेपाल ओलम्पिक कमिटी (एनओसी)का अध्यक्ष जीवनराम श्रेष्ठ, उपाध्यक्ष चतुरानन्द राजवैद्य र राष्ट्रिय खेलकुद परिषद्की सदस्य सिक्का सुवाल श्रेष्ठ सहभागी हुनुभएको छ।

दक्षिण एसिया ओलम्पिक काउन्सिलको केन्द्रीय कमिटी बैठकमा एनओसी अध्यक्ष श्रेष्ठ र उपाध्यक्ष राजवैद्यले ओलम्पिक कमिटीको प्रतिनिधित्व गर्नुभएको छ भने राखेप सदस्य श्रेष्ठले सरकारको प्रतिनिधित्व गर्नुभएको छ।

बैठकमा १४औँ दक्षिण एसियाली खेलकुदको आयोजनासम्बन्धी तयारी तथा अन्य महत्वपूर्ण विषयमा छलफल भइरहेको जनाइएको छ। बैठक भोलिसम्म चल्नेछ।

Originally published on abcnews.com.np.