काठमाडौँ । नेपाली कांग्रेसका निवर्तमान केन्द्रीय सदस्य नैनसिंह महरले पार्टीभित्रको विवाद अन्त्य गरी एकता कायम गर्न तीनवटा विकल्प अघि सारेका छन्। उनले कांग्रेस सभापति गगन थापा र निवर्तमान सभापति शेरबहादुर देउवासँग छुट्टाछुट्टै भेट गरी यी विकल्पमा सहमति खोज्न आग्रह गरेका हुन्।
महरले भदौ ४ गते सभापति थापासँग ज्ञानेश्वरस्थित सम्पर्क कार्यालयमा भेट गरेका थिए। भेटमा उनले १५औँ महाधिवेशनअघि पार्टीको बृहत् एकताका लागि थापा र देउवाबीच सहमति आवश्यक रहेको बताएका थिए।
महरका तीन विकल्प
महरले अघि सारेको पहिलो विकल्पमा १५औँ महाधिवेशनको नेतृत्व थापा र देउवामध्ये एक जनाले गर्ने विषयमा सहमति खोज्नुपर्ने उल्लेख छ। उनका अनुसार, दुवैमध्ये जसले नेतृत्व छोडे पनि पार्टी एकताका लागि त्यस्तो सहमति गर्न सकिन्छ।
दोस्रो विकल्पमा दुवैमध्ये कसैले पनि नेतृत्व छोड्न नसक्ने अवस्था आए तेस्रो व्यक्तिको नेतृत्वमा सहमति खोज्नुपर्ने उनको प्रस्ताव छ। त्यस्तो नेतृत्वले १५औँ महाधिवेशन निष्पक्ष रूपमा सम्पन्न गर्न सक्ने विश्वास हुनुपर्ने उनको भनाइ छ।
तेस्रो विकल्पमा भने सर्वोच्च अदालतबाट कांग्रेसको आधिकारिकतासम्बन्धी आउने अन्तिम फैसला स्वीकार गरेर अघि बढ्ने पूर्वसहमति गर्नुपर्ने महरले सुझाव दिएका छन्।
थापासँगको भेटमा महरले भनेका थिए, ‘तपाईं र शेरबहादुर दाइ भेटवार्ता गर्नुहोस्। तीनवटा विकल्पमध्ये एउटामा सहमति भएन भने पार्टी विभाजन हुन्छ।’
उनले पार्टी विभाजन रोक्न थापा र देउवाबीच सहमति अनिवार्य रहेको बताएका थिए। जवाफमा थापाले देउवासँग भेटवार्ता गर्न आफू तयार रहेको र अनौपचारिक रूपमा संवाद भइरहेको बताएका थिए।
देउवासँग पनि एकताका लागि आग्रह
थापासँग भेटेको तीन दिनपछि महर आइतबार बिहान निवर्तमान सभापति देउवालाई भेट्न चुनदेवीस्थित निवास पुगेका थिए। भेटमा उनले थापासँग राखेका तीनवटै विकल्पबारे देउवालाई जानकारी गराएका थिए।
महरले पार्टीभित्रको द्वन्द्व अन्त्य गरी एकताबद्ध कांग्रेस निर्माणमा देउवाको भूमिका महत्त्वपूर्ण रहेको बताएका छन्।
उनका अनुसार देउवाले भने अदालतको निर्णयपछि अघि बढ्ने जवाफ दिएका छन्। महरले अदालतको अन्तिम निर्णय आउनुअघि नै पार्टीभित्र सहमति कायम गर्न आफूले आग्रह गरेको बताए।
यसैबीच, कांग्रेस डडेल्धुराका पूर्वजिल्ला सभापति कर्णबहादुर मल्लले पनि आइतबार देउवालाई भेटेर पार्टी एकताका लागि अभिभावकीय भूमिका निर्वाह गर्न आग्रह गरेका छन्।
Originally published on abcnews.com.np.
प्रतिक्रिया दिनुहोस्