काठमाडौँ । वैदेशिक रोजगारीमा आकर्षक तलबको प्रलोभन देखाएर विभिन्न देशमा रोजगारी दिलाइदिने भन्दै रकम ठगी गरेको आरोपमा प्रहरीले दुई जनालाई पक्राउ गरेको छ ।

पक्राउ पर्नेमा काभ्रेपलाञ्चोकको मण्डनदेउपुर नगरपालिका–१२ का ३७ वर्षीय नवीन लामा र सल्यानको शारदा नगरपालिका–२ का ५० वर्षीय रमेश रेउले रहेका छन् । उनीहरूलाई गत शुक्रबार काठमाडौँ उपत्यका अपराध अनुसन्धान कार्यालयबाट परिचालित प्रहरी टोलीले पक्राउ गरेको हो ।

प्रहरीका अनुसार लामाले मलेसियामा रोजगारी दिलाइदिने भन्दै तीन जनाबाट १४ लाख रुपैयाँ लिएका थिए । यस्तै, रेउलेले अमेरिकामा रोजगारी लगाइदिने प्रलोभन देखाएर एक जनाबाट तीन लाख रुपैयाँ लिएको आरोप छ । रकम लिएपछि दुवै जना सम्पर्कविहीन भएको प्रहरीको भनाइ छ ।

अनुसन्धान जारी

पक्राउ परेका दुवै जनालाई आवश्यक अनुसन्धानका लागि काठमाडौँ उपत्यका अपराध अनुसन्धान कार्यालयमा पठाइएको प्रहरीले जनाएको छ । उनीहरूमाथि ठगीसम्बन्धी कसुरमा अनुसन्धान भइरहेको र लिएको रकमसमेत बरामद गर्ने प्रयास भइरहेको प्रहरीले जनाएको छ ।

Originally published on abcnews.com.np.