काठमाडौँ । यस वर्ष देशभर धान रोपाइँको अवस्था उत्साहजनक देखिएको छ । कृषि विभागका अनुसार, धानखेतीयोग्य कुल जमिनको ९८ प्रतिशत क्षेत्रमा रोपाइँ सम्पन्न भएको छ ।

विभागको पछिल्लो तथ्याङ्कअनुसार देशभर हालसम्म १३ लाख ४१ हजार ७ सय ६४ हेक्टर क्षेत्रफलमा धान रोपाइँ सकिएको छ । गत वर्षको सोही अवधिमा ९६.०८ प्रतिशत क्षेत्रमा मात्र रोपाइँ भएको थियो । यस वर्ष रोपाइँको दर झण्डै दुई प्रतिशतले बढेको हो ।

सुदूरपश्चिममा शतप्रतिशत रोपाइँ

प्रदेशगत रूपमा सुदूरपश्चिममा सबैभन्दा बढी रोपाइँ भएको छ । त्यहाँ १ लाख ५४ हजार ९ सय ५० हेक्टर क्षेत्रफलमा रोपाइँ सम्पन्न भई शतप्रतिशत पुगेको छ ।

कर्णालीमा ९८.५० प्रतिशत, मधेशमा ९८.१० प्रतिशत र लुम्बिनीमा ९७.८७ प्रतिशत क्षेत्रमा रोपाइँ सकिएको छ । मधेशमा गत वर्षको तुलनामा उल्लेख्य सुधार भएको छ । गत वर्ष यही अवधिमा मधेशमा ८६.३५ प्रतिशत मात्र रोपाइँ भएको थियो ।

त्यस्तै, बागमतीमा ९७.८२ प्रतिशत, कोशीमा ९७ प्रतिशत र गण्डकीमा ९६.६८ प्रतिशत क्षेत्रमा धान रोपाइँ सम्पन्न भएको विभागले जनाएको छ ।

समयमै मनसुन सक्रिय हुँदा रोपाइँमा सुधार

कृषि विभागका अनुसार समयमै मनसुन सक्रिय हुनु तथा कृषि प्रसारका कार्यक्रम प्रभावकारी रूपमा सञ्चालन हुनुका कारण यस वर्ष धान रोपाइँको क्षेत्रफल र प्रतिशत दुवैमा वृद्धि भएको हो ।

Originally published on abcnews.com.np.