काठमाडौं । गैरआवासीय नेपाली संघ (एनआरएनए)ले आफ्नो सांगठनिक सञ्जाललाई विश्वका १०० भन्दा बढी मुलुकमा विस्तार गर्ने लक्ष्य लिएको छ।

नेपाल चेम्बर अफ कमर्स र एनआरएनएबीच आइतबार आयोजित समझदारीपत्र (एमओयू) हस्ताक्षर कार्यक्रममा बोल्दै संघका अध्यक्ष डा. हेमराज शर्माले विदेशमा रहेका नेपालीको व्यापक उपस्थिति र सम्भावनालाई संगठित गर्दै एनआरएनएको सञ्जाल विस्तार गर्ने प्रतिबद्धता व्यक्त गरे।

उनका अनुसार एनआरएनएको तथ्यांकमा हाल विश्वका कम्तीमा ११० देशमा नेपालीहरूको उपस्थिति रहेको छ। तीमध्ये ९२ देशमा गैरआवासीय नेपाली संघका राष्ट्रिय समन्वय परिषद् (एनसीसी) स्थापना भइसकेका छन्।

“हाम्रो रेकर्डअनुसार ११० राष्ट्रमा नेपालीहरू छन्, त्योभन्दा बढी राष्ट्रमा पनि हुन सक्नुहुन्छ,” अध्यक्ष शर्माले भने, “अहिले ९२ देशमा हाम्रो राष्ट्रिय समन्वय परिषद् छ। यो कार्यकालभित्र हामी यसलाई १०० भन्दा बढी देशमा विस्तार गर्छौं।”

डा. शर्माले नेपाली हुनुको पहिचान भौगोलिक सीमाना र कानुनी परिभाषामा मात्र सीमित नरहेको उल्लेख गर्दै विश्वभर छरिएका नेपालीबीचको सम्बन्धलाई थप संस्थागत र व्यवस्थित बनाउनुपर्नेमा जोड दिए।

उनले विदेशमा रहेका नेपालीसँग रहेको ज्ञान, सीप, अनुभव, प्रविधि र पुँजीलाई नेपालको आर्थिक तथा सामाजिक विकाससँग जोड्नु एनआरएनएको प्रमुख उद्देश्य रहेको बताए।

एनआरएनएले आफ्नो विश्वव्यापी सञ्जाल विस्तारसँगै विदेशमा रहेका नेपालीलाई थप प्रभावकारी रूपमा संगठित गर्ने र उनीहरूको क्षमता तथा स्रोतलाई नेपालको विकासमा परिचालन गर्ने लक्ष्य लिएको जनाएको छ।

Originally published on abcnews.com.np.