कोनाक्री, गिनी । गिनीको राजधानी कोनाक्रीमा भारी वर्षापछि फोहोरको थुप्रो भत्किँदा कम्तीमा ३० जनाको मृत्यु भएको छ। घटनामा २२ जना घाइते भएका छन्। घाइतेमध्ये ६ जनाको अवस्था गम्भीर रहेको बताइएको छ।

स्थानीय समयअनुसार सोमबार बिहान करिब २ बजे सहरको दार–एस–सलाम क्षेत्रमा फोहोरको ठूलो थुप्रो अचानक भत्किएर नजिकैका घरहरूमा खसेको हो।

गिनी सरकारका अनुसार भारी वर्षापछि फोहोरको पहाड भत्किएको हो। त्यस क्रममा धेरै मानिस फोहोर र भग्नावशेषमा पुरिएको आशंका गरिएको छ। उद्धार तथा राहतका लागि सेनासहित ठूलो संख्यामा सुरक्षाकर्मी परिचालन गरिएको सरकारले जनाएको छ।

एक महिलाले स्थानीय सञ्चारमाध्यमसँग आफ्ना पाँच सन्तान फोहोरको थुप्रोले पुरिएर मृत्यु भएको बताएकी छन्। अधिकारीहरूले भग्नावशेषमुनि अझै मानिसहरू फसेको हुन सक्ने आशंका गरेका छन्। उद्धार कार्य जारी रहेकाले मृतकको संख्या बढ्न सक्ने चेतावनी दिइएको छ।

गिनीका प्रधानमन्त्री अमाडोउ ओरी बाले घटनास्थल पुगेर अवस्थाबारे जानकारी लिएका छन्।

उद्धार तथा राहत

घटनापछि उद्धार टोली तत्काल घटनास्थलमा परिचालन गरिएको छ। सुरक्षाकर्मीले फोहोर हटाएर भग्नावशेषमुनि फसेकाको खोजी तथा उद्धार गरिरहेका छन्।

घाइतेहरूलाई नजिकका अस्पतालमा लगेर उपचार भइरहेको छ। सरकारले मृतकका परिवारलाई आवश्यक सहयोग उपलब्ध गराउने जनाएको छ।

Originally published on abcnews.com.np.