हुम्ला । हुम्लाको ताँजाकोट गाउँपालिकाको प्रशासनिक भवनमा गएराति आगलागी हुँदा महत्वपूर्ण कागजात तथा कार्यालयका सामग्री जलेर नष्ट भएका छन्।

आइतबार राति करिब २ बजे गाउँपालिकाको प्रशासनिक भवनमा आगलागी सुरु भएको थियो। स्थानीयवासी र प्रहरीको सहयोगमा आगो नियन्त्रणमा लिइएको स्थानीय नरवीर थापाले जानकारी दिए।

आगलागी हुँदा भवनमा गाउँपालिकाका केही कर्मचारीसमेत बसिरहेका थिए। नजिकै रहेको प्रहरी चौकी र स्थानीयवासी तत्काल घटनास्थलमा पुगेर आगो नियन्त्रणमा लिएका थिए। आगलागीबाट भवनमा ठूलो क्षति पुगेको बताइएको छ।

गाउँपालिका प्रशासन तथा जिन्सी शाखा प्रमुख विष्णुलाल सार्कीका अनुसार आगलागीको कारण यकिन भइसकेको छैन। प्रारम्भिक रूपमा विद्युत् सर्ट भएर आगलागी भएको हुनसक्ने अनुमान गरिए पनि विस्तृत अनुसन्धानपछि मात्रै कारण खुल्ने उनले बताए।

आगलागीबाट जिन्सी शाखा पूर्णरूपमा जलेको छ। शाखामा राखिएका अधिकांश श्रेस्ता तथा महत्वपूर्ण कागजात नष्ट भएका छन्। लेखा शाखा र न्यायिक समितिको सचिवालयमा रहेका कागजातसमेत जलेर क्षति भएको सार्कीले जानकारी दिए।

गत वर्ष मात्रै उद्घाटन गरिएको उक्त प्रशासनिक भवन जिल्लाकै नमुना भवनका रूपमा निर्माण गरिएको थियो। भवनको तल्लो तलामा जिन्सी शाखालगायतका कार्यालय तथा माथिल्लो तलामा गाउँपालिका अध्यक्ष, उपाध्यक्ष र प्रमुख प्रशासकीय अधिकृतका कार्यकक्ष रहेका थिए।

स्थानीयवासीका अनुसार रातिको समयमा आगलागी भएकाले घटना केही ढिलो गरी थाहा भएको थियो। प्रारम्भिक अनुमानमा जिन्सी शाखामा राखिएका ब्याट्री पड्किएपछि आगलागी भएको हुनसक्ने बताइएको छ।

जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काले आगलागीको कारणबारे अनुसन्धान भइरहेको बताए। उनका अनुसार घटनाको वास्तविक कारण यकिन गर्न कार्यालयमा जडान गरिएको सीसीटीभीको फुटेजसमेत हेरेर अनुसन्धान गरिनेछ।

आगलागीबाट गाउँपालिका भवनको विद्युत् तार तथा बल्बहरूमा समेत क्षति पुगेको छ।

Originally published on abcnews.com.np.