विराटनगर । कोशी प्रदेश सरकारले कर्मचारी सरुवा प्रक्रियालाई प्रविधिमैत्री र पारदर्शी बनाउन एकीकृत सरुवा व्यवस्थापन प्रणाली (Integrated Transfer Management System–ITMS) कार्यान्वयनमा ल्याएको छ । प्रदेश तहमा कर्मचारी सरुवाका लागि एकीकृत डिजिटल प्रणाली प्रयोग गर्ने यो नेपालमै पहिलो प्रयास भएको प्रदेश सरकारले जनाएको छ ।

कोशी प्रदेशको सुशासन तथा डिजिटल रूपान्तरण अभियानअन्तर्गत सामाजिक विकास मन्त्रालयले भदौको पहिलो सातादेखि ITMS मार्फत काम सुरु गरेको हो । सामाजिक विकास मन्त्रालयका सचिव विष्णुप्रसाद कोइरालाले प्रणालीमार्फत सरुवाको निर्णय गर्दै यसको औपचारिक सुरुवात गरेका छन् ।

मुख्यमन्त्री तथा मन्त्रिपरिषद्को कार्यालयका सचिव नारायणप्रसाद रिसालका अनुसार प्रणाली कार्यान्वयनसँगै प्रदेशको प्रशासनिक सुधारमा महत्वपूर्ण उपलब्धि थपिएको छ । उनका अनुसार यसले कर्मचारी सरुवामा हुने कागजी झन्झट, ढिलासुस्ती तथा व्यक्तिगत पहुँचका आधारमा हुने निर्णयलाई निरुत्साहित गर्दै प्रक्रियालाई प्रमाणमा आधारित र पारदर्शी बनाउन सहयोग गर्नेछ ।

मुख्यमन्त्री कार्यालयका कम्प्युटर अधिकृत विनय भास्कर दत्तका अनुसार प्रदेश तहमा कर्मचारी सरुवाका लागि एकीकृत डिजिटल प्रणाली प्रयोग गरिएको यो पहिलोपटक हो ।

अनलाइन आवेदनदेखि डिजिटल रमाना

ITMS मार्फत कर्मचारीले सरुवाका लागि अनलाइनबाटै आवेदन दिन सक्नेछन् । आवेदनमाथि सम्बन्धित निकायले प्रणालीभित्रैबाट निर्णय गर्ने र सरुवा पत्रसमेत स्वचालित रूपमा तयार हुने व्यवस्था गरिएको छ ।

त्यस्तै, डिजिटल रमाना र हाजिरी अद्यावधिक पनि प्रणालीमार्फत नै गर्न सकिनेछ । कुन कर्मचारी कुन कार्यालयमा कार्यरत छन्, दरबन्दीको अवस्था कस्तो छ र सरुवाको प्रक्रिया कहाँ पुगेको छ भन्ने विवरणसमेत ‘रियल टाइम’मा हेर्न सकिने प्रदेश सरकारले जनाएको छ ।

सचिव रिसालका अनुसार प्रणालीले दरबन्दी तथा पदस्थापनमा हुने दोहोरोपन हटाउन र रिक्त दरबन्दीको वास्तविक अवस्था पहिचान गर्न सहयोग गर्नेछ ।

स्थानीय तहसम्म विस्तार गरिने

प्रदेशस्तरबाट सुरु गरिएको प्रणालीलाई आगामी दिनमा स्थानीय तहसम्म विस्तार गर्ने प्रदेश सरकारको योजना छ । यसबाट प्रदेश तथा स्थानीय तहमा कार्यरत कर्मचारीको विवरण एकीकृत र व्यवस्थित गर्न सहयोग पुग्ने अपेक्षा गरिएको छ ।

कोशी प्रदेश सरकारले ‘डिजिटल प्रदेश’को अवधारणाअनुसार यसअघि नै सरकारी एकीकृत कार्यालय व्यवस्थापन प्रणाली कार्यान्वयनमा ल्याइसकेको छ । यस्तै, ‘योजना बैंक’ र ‘मुख्यमन्त्री ड्यासबोर्ड’ जस्ता डिजिटल प्रणालीसमेत सञ्चालनमा ल्याइएको प्रदेश सरकारले जनाएको छ ।

मुख्यमन्त्री हिक्मतकुमार कार्कीले कोशी प्रदेशलाई प्रविधिमैत्री प्रशासनको क्षेत्रमा अगाडि बढाउने सरकारको नीति रहेको बताए । उनले सरकारका सेवा तथा प्रशासनिक कामलाई क्रमशः पूर्ण रूपमा डिजिटल बनाउने प्रतिबद्धता व्यक्त गरे ।

३ हजार २०० कर्मचारी कार्यरत

कोशी प्रदेशमा करिब ४ हजार कर्मचारीको दरबन्दी रहेकोमा हाल झन्डै ३ हजार २०० कर्मचारी कार्यरत छन् । सीमित जनशक्तिबाट प्रशासनिक कामलाई छिटो, छरितो र पारदर्शी बनाउन ITMS ले सहयोग गर्ने प्रदेश सरकारको अपेक्षा छ ।

Originally published on abcnews.com.np.