जनकपुरधाम । सप्तरीको शम्भुनाथ नगरपालिका–३ मा दुई वर्षीया बालिकाको हत्या भएको छ। प्रहरीले बालिकाको हत्या आरोपमा उनकी १९ वर्षीया सौतेनी आमा मुस्कान खातुनलाई पक्राउ गरेको जनाएको छ।

जिल्ला प्रहरी कार्यालय सप्तरीका प्रहरी उपरीक्षक (एसपी) रूपक खड्काका अनुसार मोहम्मद इरफानकी छोरी खुशी खातुन आइतबार बिहान घरबाट हराएकी थिइन्। खोजी गर्ने क्रममा करिब दुई घण्टापछि घर पछाडिको झाडीमा उनको शव फेला परेको थियो।

प्रहरीले शव पोस्टमार्टमका लागि राजविराजस्थित गजेन्द्रनारायण सिंह अस्पताल पठाएको छ। एसपी खड्काका अनुसार बालिकाको शरीरमा बाहिरबाट देखिने घाउचोट छैन। प्रारम्भिक अनुसन्धानका क्रममा सौतेनी आमाको संलग्नता देखिएपछि उनलाई पक्राउ गरिएको हो।

पारिवारिक विवादको पृष्ठभूमि

मृतकका बुवा मोहम्मद इरफान वैदेशिक रोजगारीका क्रममा कतारमा रहेको प्रहरीले जनाएको छ। स्थानीयका अनुसार इरफानकी जेठी र कान्छी पत्नीबीच लामो समयदेखि विवाद थियो। शनिबार पनि उनीहरूबीच झगडा भएको र पारिवारिक सम्पत्तिको विषयमा विवाद हुने गरेको बताइएको छ।

पुख्र्यौली घरमा इरफानकी जेठी पत्नी र छोरी खुशी बस्दै आएका थिए भने कान्छी पत्नी मुस्कान नजिकै डेरा लिएर बस्दै आएकी थिइन्।

स्थानीयको प्रदर्शन

बालिकाको हत्या भएको विरोधमा स्थानीयले आइतबार दिउँसो केही समय रुपनी बजार बन्द गराएका थिए। दोषीमाथि कडा कारबाहीको माग गर्दै स्थानीयले प्रदर्शनसमेत गरेका थिए।

प्रहरीका अनुसार अहिले रुपनी बजार र राजमार्गमा भएको अवरोध हटिसकेको छ। घटनाबारे थप अनुसन्धान भइरहेको प्रहरीले जनाएको छ।

Originally published on abcnews.com.np.