मकवानपुर। राष्ट्रिय प्रजातन्त्र पार्टी (राप्रपा) ले बागमती प्रदेशका मुख्यमन्त्री किरण थापा मगरले लिन लागेको विश्वासको मतको विपक्षमा मतदान गर्न आफ्ना प्रदेश सभा सदस्यलाई ह्विप जारी गरेको छ।

राप्रपा बागमती प्रदेश संसदीय दलकी प्रमुख सचेतक कुमारी तामाङले सोमबार बस्ने प्रदेश सभा बैठकमा मुख्यमन्त्री थापाले पेस गर्ने विश्वासको मतको प्रस्तावको विपक्षमा मतदान गर्न प्रदेश सभा सदस्यलाई निर्देशन दिनुभएको हो।

प्रमुख सचेतक तामाङद्वारा जारी ह्विपमा विश्वासको मतको प्रस्तावको विपक्षमा मतदान गर्न, तटस्थ नबस्न र बैठकमा अनुपस्थित नहुन निर्देशन दिइएको उल्लेख छ।

राप्रपाका प्रदेश सभा सदस्य तथा पूर्वप्रदेश सभामुख भुवनकुमार पाठकले मुख्यमन्त्री थापाको विश्वासको मतको विपक्षमा मतदान गर्न पार्टी केन्द्र र प्रमुख सचेतकबाट ह्विप जारी भएको बताउनुभयो।

सरकारमा सहभागितालाई लिएर विवाद

राप्रपामा प्रदेश संसदीय दल र पार्टी केन्द्रबीच विवाद चलिरहेका बेला ह्विप जारी भएको हो। पार्टी केन्द्रको निर्णयविपरीत राप्रपा बागमती प्रदेश संसदीय दलका नेता उद्धव थापाले एमाले नेतृत्वको सरकारलाई समर्थन गर्दै सरकारमा सहभागी हुने निर्णय गरेपछि विवाद बढेको हो।

एमाले नेतृत्वको सरकारमा राप्रपाका तीन प्रदेश सभा सदस्य गिरबहादुर तामाङ, राजु विष्ट र राजेन्द्र प्रजापति मन्त्रीका रूपमा सहभागी हुनुहुन्छ।

राप्रपा केन्द्रीय अनुशासन समितिले संसदीय दलका नेता उद्धव थापासहित सरकारमा सहभागी मन्त्रीहरूमाथि कारबाही तथा स्पष्टीकरणको प्रक्रिया अघि बढाएको छ। पार्टी केन्द्रको निर्णय र सहमतिविना सरकारलाई समर्थन गरेको भन्दै उनीहरूमाथि अनुशासनसम्बन्धी प्रक्रिया अघि बढाइएको हो।

सोमबार विश्वासको मत

नेपालको संविधानको धारा १८८ को उपधारा (४) तथा बागमती प्रदेश सभा नियमावली, २०७४ को नियम १४३ बमोजिम मुख्यमन्त्री थापाले सोमबार दिउँसो १ बजे बस्ने प्रदेश सभा बैठकमा विश्वासको मतको प्रस्ताव पेस गर्ने कार्यसूची छ।

बागमती प्रदेश सभामा राप्रपाका १२ जना प्रदेश सभा सदस्य छन्। पार्टीले विपक्षमा मतदान गर्न ह्विप जारी गरेपछि मुख्यमन्त्री थापाको विश्वासको मतमा राप्रपाका प्रदेश सभा सदस्यहरूको भूमिका महत्वपूर्ण हुने देखिएको छ।

Originally published on abcnews.com.np.