पर्वत । प्रहरीले १० तोला सुनका गहनासहित पर्वतबाट एक युवकलाई पक्राउ गरेको छ ।

पक्राउ पर्नेमा मोदी गाउँपालिका–५ बाजुङका करिब ३० वर्षीय खड्कबहादुर कुँवर रहेका छन् । उनलाई मोदी गाउँपालिका–६, उपल्लो डिमुवाबाट चोरी भएको १० तोला सुनका गहनासहित पक्राउ गरिएको प्रहरीले जनाएको छ ।

प्रहरीका अनुसार कुँवरले मोदी गाउँपालिका–२ पातिचौरस्थित देउराली होटलका सञ्चालक दिनेशकुमार पुनको घरबाट सुनका गहना चोरी गरेको आरोप छ ।

पुनको घरको सुत्ने कोठाबाट गहना चोरी भएको जानकारी पाएपछि जिल्ला प्रहरी कार्यालय पर्वतबाट प्रहरी निरीक्षक दिनेश पौडेलको कमान्डमा ६ जनाको प्रहरी टोली परिचालन गरिएको थियो ।

टोलीले खोजी गर्ने क्रममा कुँवरलाई उपल्लो डिमुवाबाट चोरीका गहनासहित पक्राउ गरेको हो ।

पक्राउ परेका कुँवरलाई जिल्ला प्रहरी कार्यालय पर्वतको हिरासतमा राखिएको छ । घटनाबारे थप अनुसन्धान भइरहेको प्रहरीले जनाएको छ ।

Originally published on abcnews.com.np.