काठमाडौँ । नेपाल राष्ट्र बैंकका पूर्वगभर्नर महाप्रसाद अधिकारीको भैँसेपाटीस्थित घरमा जेनजी आन्दोलनका क्रममा तोडफोड र आगजनी भएपछि सुनचाँदीका गरगहना चोरी गरेको आरोपमा प्रहरीले एक जनालाई पक्राउ गरेको छ ।

रौतहटका ३१ वर्षीय विजय राम महरा चमारलाई चोरी गरिएका सामान फिर्ता गर्न पूर्वगभर्नर अधिकारीकै घर पुगेका बेला प्रहरीले पक्राउ गरेको हो । प्रहरीका अनुसार महराबाट बरामद सुनचाँदीका गरगहनाको कुल मूल्य १० लाख २० हजार ९०७ रुपैयाँ रहेको छ ।

प्रहरीका अनुसार महरा भैँसेपाटीमा जुत्ता बनाउने पसल सञ्चालन गर्दै आएका थिए । जेनजी आन्दोलनका क्रममा पसल बन्द गरेर फर्किने क्रममा अधिकारीको घरमा ठूलो भीड देखेपछि उनी त्यहाँ पुगेका थिए ।

महराले प्रहरीसँगको बयानमा घरको मुख्य गेट फुटेको र भित्र आगलागी भइरहेको अवस्थामा करिब ६० देखि ७० जना मानिस घरभित्र प्रवेश गरिरहेको देखेको बताएका छन् । केही समयपछि आफू पनि घरभित्र प्रवेश गरी छरिएका सुनचाँदीका गरगहना टिपेर पाइन्टको खल्तीमा राखी डेरामा लुकाएको उनले स्वीकार गरेको प्रहरीले जनाएको छ ।

प्रहरीका अनुसार २०८३ साउन २० गते दिउँसो करिब १२ बजे महरा एक जोर सुनको झुम्का लिएर अधिकारीको घरमा पुगेका थिए । अधिकारीले उनलाई झुम्कासहित देखेपछि प्रहरीलाई खबर गरेका थिए ।

त्यसपछि प्रहरीले महराको खानतलासी गर्दा थप चोरीका सामान बरामद गरेको थियो । नख्खुस्थित उनको डेराबाट चाँदीजस्तो देखिने पाउजु, गणेशको मूर्ति, सिक्का, औँठी तथा अन्य सामग्रीसहित दुईवटा सुनका औँठी, एक मुन्द्रा र सातवटा झुम्का बरामद गरिएको प्रहरीले जनाएको छ ।

ललितपुर सुनचाँदी व्यवसायी संघले बरामद गरिएका सुन तथा चाँदीका गरगहनाको कुल बजार मूल्य १० लाख २० हजार ९०७ रुपैयाँ कायम गरेको छ । बरामद गरिएका गरगहना पूर्वगभर्नर अधिकारीले फिर्ता लगिसकेका छन् ।

जेनजी आन्दोलनका क्रममा अधिकारीको घरमा अपरिचित समूहले प्रवेश गरी तोडफोड र आगजनी गरेको थियो । घटनास्थलको मुचुल्कामा घरका झ्यालका सिसा फुटाइएको तथा टेलिभिजन, सोकेस, फ्रिज, ओभनलगायतका सामान तोडफोड गरिएको उल्लेख छ । दुईवटा निजी सवारीसाधनसमेत तोडफोड गरिएको थियो ।

घरको दोस्रो तलामा रहेको मास्टर बेडरुमको दराज तोडफोड गरी सुनका विभिन्न गरगहना, चाँदीका सिक्का तथा नगद चोरी भएको उल्लेख छ । अधिकारीकी छोरी डा. महिमा अधिकारीको सक्कल प्रमाणपत्रसमेत चोरी भएको जनाइएको छ ।

पूर्वगभर्नर अधिकारीले प्रहरीमा दिएको जाहेरीमा घर तथा धनमालमा भएको कुल क्षति १ करोड ५० लाख रुपैयाँ रहेको दाबी गरेका छन् । तर, महराबाट बरामद चोरीका सामानको मूल्य भने १० लाख २० हजार ९०७ रुपैयाँ रहेको प्रहरीले जनाएको छ ।

अनुसन्धानका क्रममा महराले आफूले आगजनी तथा तोडफोड नगरेको दाबी गरेका छन् । सरकारी वकिल कार्यालयले उनीविरुद्ध मुलुकी अपराध संहिता, २०७४ को दफा २४१ बमोजिम चोरीको कसुरमा अभियोग दायर गरेको छ ।

अभियोगमा उनलाई तीन वर्षसम्म कैद र ३० हजार रुपैयाँसम्म जरिवाना माग गरिएको छ । घटनामा अन्य व्यक्तिको संलग्नताबारे भने अनुसन्धान जारी रहेको प्रहरीले जनाएको छ ।

Originally published on abcnews.com.np.