काठमाडौँ । राष्ट्रिय प्रजातन्त्र पार्टी (राप्रपा) ले बागमती प्रदेश सभा सदस्य उद्धव थापालाई पदमुक्त गर्न माग गर्दै प्रदेश सभामा औपचारिक पत्र बुझाएको छ।

राप्रपा अध्यक्ष राजेन्द्र लिङ्देनले हस्ताक्षर गरेको पत्र बागमती प्रदेश संसदीय दलकी प्रमुख सचेतक कुमारी तामाङले सोमबार प्रदेश सभाकी उपसभामुख अप्सरा चापागाईंलाई बुझाएकी हुन्।

राप्रपाको केन्द्रीय कार्यालयबाट भदौ ८ गते जारी गरिएको पत्रमा उद्धव थापाले पार्टीको निर्णय, नीति र निर्देशनविपरीत बागमती प्रदेशको मुख्यमन्त्री नियुक्तिका लागि पार्टीका सांसदको समर्थन रहेको भन्दै प्रदेश प्रमुखसमक्ष स्वेच्छाचारी रूपमा पत्र बुझाएको आरोप लगाइएको छ।

पार्टीले थापाको उक्त कदमलाई पार्टीको नीति, निर्देशन र विधानविपरीत भएको तथा अनुशासनको गम्भीर उल्लंघन भएको दाबी गरेको छ। सोही आधारमा राप्रपाको केन्द्रीय कार्यसम्पादन समितिले उनलाई बागमती प्रदेश सभा सदस्य पदबाट पदमुक्त गर्ने निर्णय गरेको पत्रमा उल्लेख छ।

अनुशासन समितिको सिफारिसपछि कारबाही

राप्रपाका अनुसार केन्द्रीय कार्यसम्पादन समितिको भदौ ४ गते बसेको बैठकले अनुशासन समितिको सिफारिसका आधारमा उद्धव थापालाई प्रदेश सभा सदस्य पदबाट पदमुक्त गर्ने निर्णय गरेको हो।

थापामाथि कारबाहीको माग गर्दै बुझाइएको पत्रसँगै राप्रपाले कारबाही प्रक्रियासँग सम्बन्धित आठ वटा कागजातसमेत प्रदेश सभामा पेस गरेको छ।

ती कागजातमा साउन २० गतेको केन्द्रीय कार्यसम्पादन समितिको निर्णय, साउन २१ गतेको बागमती प्रदेशसभा संसदीय दलको निर्णय, भदौ १ गते संसदीय दललाई पार्टीले दिएको निर्देशन तथा सोही दिनको संसदीय दलको निर्णय समावेश छन्।

त्यस्तै, अनुशासन समितिले उद्धव थापासँग मागेको स्पष्टीकरण, कारबाहीसम्बन्धी समितिको सिफारिस, भदौ ३ गते बागमती प्रदेश प्रमुखलाई पठाइएको पत्र र भदौ ४ गते केन्द्रीय कार्यसम्पादन समितिले उनलाई पदमुक्त गर्ने निर्णयको प्रतिलिपिसमेत प्रदेश सभामा बुझाइएको छ।

मुख्यमन्त्री नियुक्तिदेखि पदमुक्तिको मागसम्म

यसअघि राप्रपा केन्द्रले पार्टीको निर्णयविपरीत बागमती प्रदेशमा एमाले संसदीय दलका नेता किरण थापा मगरलाई मुख्यमन्त्री बनाउन समर्थन गरेको आरोपमा उद्धव थापामाथि कारबाही प्रक्रिया अघि बढाएको थियो।

राप्रपा केन्द्रले बागमती प्रदेश सरकार गठनमा पार्टीको आधिकारिक सहभागिता वा समर्थन नरहेको स्पष्ट गर्दै आएको छ। तर, संसदीय दलका नेता थापाले पार्टीका सांसदको समर्थन रहेको भन्दै मुख्यमन्त्री नियुक्तिका लागि समर्थन पत्र बुझाएपछि केन्द्र र प्रदेश संसदीय दलबीचको विवाद चर्किएको हो।

राप्रपा बागमती प्रदेश संसदीय दलकी प्रमुख सचेतक कुमारी तामाङले यसअघि नै उद्धव थापामाथि कारबाही नभएसम्म प्रदेश सभा बैठक सञ्चालन हुन नदिने चेतावनी दिएकी थिइन्।

अब राप्रपाले उनलाई प्रदेश सभा सदस्य पदबाटै पदमुक्त गर्न औपचारिक पत्र बुझाएपछि बागमतीको सत्ता राजनीतिसँगै उद्धव थापाको सांसद पदसम्बन्धी विवाद थप पेचिलो बनेको छ।

Originally published on abcnews.com.np.