काठमाडौं । नेकपा (एमाले) का प्रमुख सचेतक ऐन महरले कैलालीको गोदावरीमा भएको एक घटनालाई लिएर संसद्मा गम्भीर प्रश्न उठाएका छन्। उनले गाडीको ठक्करबाट घाइते भएकी एक महिलालाई पुनः गाडी ब्याक गरेर हत्या गरिएको दाबी गरेका छन्।

प्रतिनिधिसभाको बैठकमा बोल्दै महरले कैलालीको गोदावरी नगरपालिका–२ मा सिन्की बोहराको गाडी ब्याक गरेर हत्या गरिएको आरोप लगाए।

उनका अनुसार गाडीको ठक्करबाट बोहराको खुट्टा भाँचिएको थियो। त्यसपछि पनि गाडी ब्याक गरेर उनलाई किचिएको र घटनामा उनको मृत्यु भएको महरको दाबी छ।

घटनाको विरोधमा मृतकका आफन्त तथा स्थानीयवासी भेला भएपछि प्रहरीले उनीहरूलाई जबर्जस्ती हटाएको आरोपसमेत महरले लगाए। विरोधका क्रममा मृतक बोहराका श्रीमान्समेत घाइते भएको उनले बताए।

“त्यहाँ मृतकका आफन्तहरूसहित स्थानीयहरू भेला भएर घटनाको विरोध गरे,” महरले संसद्मा भने, “प्रहरीले त्यो गाडीका चालकलाई कारबाही गर्नुको साटो जबर्जस्ती त्यहाँबाट उठायो।”

महरले घटनाको निष्पक्ष छानबिन गर्न तथा दोषीमाथि कानुनी कारबाही गर्न सरकारको ध्यानाकर्षण गराएका छन्।

Originally published on abcnews.com.np.