काठमाडौँ । राष्ट्रिय स्वतन्त्र पार्टी (रास्वपा) का महामन्त्री तथा सांसद विपीन आचार्यले बाराकी तीन वर्षीया बालिका हत्या प्रकरणमा पीडित परिवार र अभियुक्तसँग सम्बन्धित भिडियो सार्वजनिक गरिएकोप्रति आपत्ति जनाएका छन्।

प्रतिनिधिसभाको सोमबारको बैठकमा बोल्दै आचार्यले घटनापछि गृह मन्त्रालयमा मृतक बालिकाका परिवारसँग गरिएको कुराकानीको भिडियो सार्वजनिक गर्नु उपयुक्त नभएको बताए। अभियुक्तसँग बयान लिँदै वा स्वास्थ्य परीक्षणका क्रममा रेकर्ड गरिएका भिडियोसमेत सामाजिक सञ्जालमा सार्वजनिक हुनु गलत अभ्यास भएको उनको भनाइ थियो।

‘मृतकको बुवाआमाले धन्यवाद भनेको भिडियो मन्त्रालयमा खिचिन्छ,’ आचार्यले भने, ‘कतै मेडिकल गर्दै गर्दा अभियुक्तले बोलेका कुराहरूलाई सार्वजनिक तरिकाले पब्लिकमा राखिन्छ। यस्तो बन्द गरिनुपर्छ।’

उनले गृह मन्त्रालय र नेपाल प्रहरीबाट भइरहेका यस्ता गतिविधिमाथि प्रश्न उठाउँदै संवेदनशील आपराधिक घटनालाई प्रचारको माध्यम बनाउन नहुने बताए।

पीडित परिवारको पीडा र अभियुक्तको अनुसन्धान प्रक्रियासँग जोडिएका सामग्री सार्वजनिक गर्दा समाजमा नकारात्मक प्रभाव पर्न सक्ने उल्लेख गर्दै आचार्यले प्रश्न गरे, ‘हामीले कस्तो समाज बनाइरहेका छौँ?’

Originally published on abcnews.com.np.