काठमाडौँ । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले बलात्कार र भ्रष्टाचारजस्ता गम्भीर अपराधमा संलग्न तथा दोषी ठहर भएकामाथि कडा कारबाहीको व्यवस्था गर्न माग गरेका छन्। उनले बलात्कारी र भ्रष्टाचारीलाई घटनास्थलमै गोली हान्ने कानुन लागू गर्न सरकारसँग आग्रह गरेका हुन्।

सोमबार प्रतिनिधिसभा बैठकमा बोल्दै सांसद सुनारले बझाङकी सम्झना कामी, कञ्चनपुरकी निर्मला पन्त, कैलालीकी माया कामी, रुपन्देहीकी अंगिरा पासी, खोटाङकी रेस्मिका परियार, म्याग्दीकी मिना परियार तथा हालै बारामा बलात्कारपछि हत्या गरिएकी गरिमा चौधरीलगायतका घटनाको स्मरण गरे।

देशमा बलात्कार, हत्या र महिला हिंसाका घटनाको सूची लामो बन्दै गएको उल्लेख गर्दै उनले पीडितको नाम लिएर संसद्मा लामो बहस गर्नु मात्र पर्याप्त नहुने बताए। महिलाको सम्मान, सुरक्षा र बाँच्न पाउने अधिकार राज्यले प्रभावकारी रूपमा सुनिश्चित गर्नुपर्नेमा उनले जोड दिए।

‘चेलीहरू नाच्न र बाँच्न पाउनुपर्छ’

सांसद सुनारले बलात्कार र हत्याका घटनामाथि घण्टौँ बहस गर्दैमा पीडितलाई न्याय नहुने भन्दै अपराध रोक्न राज्यले कठोर कानुनी व्यवस्था गर्नुपर्ने धारणा राखे।

“चेलीहरू नाच्न र बाँच्न पाउनुपर्छ,” भन्दै उनले बलात्कार र भ्रष्टाचारमा संलग्न व्यक्तिलाई प्रमाणित भएपछि तत्काल कडा सजाय हुने व्यवस्था गर्नुपर्ने बताए।

उनले बलात्कारी र भ्रष्टाचारीलाई घटनास्थलमै गोली हान्ने कानुन बनाउन सरकारसँग माग गर्दै यस्ता गम्भीर अपराधमा कुनै पनि प्रकारको सम्झौता गर्न नहुनेमा जोड दिए।

सुनारले महिला हिंसा, बलात्कार र जघन्य अपराधका घटनामा राजनीतिक बहस वा औपचारिक सहमतिभन्दा प्रभावकारी अनुसन्धान, दोषीमाथि कानुनअनुसार कडा कारबाही र पीडितलाई न्याय सुनिश्चित गर्नु राज्यको प्रमुख दायित्व हुनुपर्ने बताए।

Originally published on abcnews.com.np.