स्याङ्जा । स्याङ्जाको गल्याङ नगरपालिका–८, करादीस्थित भित्री सडकखण्डमा बोलेरो दुर्घटना हुँदा दुई यात्रुको मृत्यु भएको छ भने चालकसहित १० जना घाइते भएका छन्।

जिल्ला प्रहरी कार्यालय स्याङ्जाका अनुसार सोमबार साँझ गल्याङबाट गल्याङ नगरपालिका–९, साङलियातर्फ जाँदै गरेको ग १ ज ६५३४ नम्बरको बोलेरो दुर्घटनामा परेको हो।

उकालो घुम्तीमा पुग्दा चालकले गाडीमाथिको नियन्त्रण गुमाएपछि बोलेरो दुर्घटनामा परेको प्रहरीले जनाएको छ। दुर्घटनामा दुई यात्रुको घटनास्थलमै मृत्यु भएको हो।

दुर्घटनामा चालकसहित १० जना घाइते भएका छन्। घाइतेहरूको स्थानीय अस्पतालमा उपचार भइरहेको प्रहरीले जनाएको छ।

बोलेरोमा दुर्घटनाका बेला कति जना सवार थिए भन्ने यकिन हुन बाँकी रहेको छ। मृतक तथा घाइतेहरूको परिचयसमेत खुल्न बाँकी रहेको जिल्ला प्रहरी कार्यालय स्याङ्जाले जनाएको छ।

Originally published on abcnews.com.np.