काठमाडौं । नेपाली प्रजातान्त्रिक आन्दोलनका शिखर व्यक्तित्व गणेशमान सिंहको जीवन, संघर्ष, त्याग र साहसमा आधारित ऐतिहासिक नाटक ‘वीर गणेशमान’ भदौ १४ गतेदेखि काठमाडौंको कालिकास्थानस्थित सर्वनाम थिएटरमा मञ्चन हुने भएको छ।

गणेशमान फाउन्डेसनको आयोजना तथा सर्वनामको प्रस्तुतिमा तयार गरिएको नाटकको परिकल्पना, नाट्य रूपान्तर तथा निर्देशन अशेष मल्लले गरेका छन्। नाटक असोज १४ गतेसम्म मञ्चन हुने आयोजकले जनाएको छ।

निर्देशक मल्लका अनुसार ‘वीर गणेशमान’ केवल ऐतिहासिक व्यक्तिको जीवनीमा आधारित नाटक नभई निष्ठा, इमानदारी, त्याग र देशप्रतिको समर्पणको कथा हो।

आफ्नो करिब पाँच दशक लामो नाट्य यात्रामा यथार्थपरक विषयमा आधारित यस्तो प्रस्तुति पहिलोपटक गर्न लागेको मल्लले बताए। विम्ब र प्रतीकमार्फत कथा प्रस्तुत गर्ने आफ्नो नियमित शैलीभन्दा यो नाटक फरक रहेको उनको भनाइ छ।

राणा शासनविरुद्धको संघर्षदेखि प्रधानमन्त्री पद अस्वीकारसम्म

नाटकमा गणेशमान सिंहले तत्कालीन राणा शासनविरुद्ध गरेको संघर्ष, भद्रगोल जेलको जीवन तथा ६ फिट अग्लो जेलको पर्खाल नाघेर गरेको साहसिक पलायनलाई विशेष रूपमा प्रस्तुत गरिएको छ।

त्यस्तै, २०४६ सालको जनआन्दोलन सफल भएपछि प्रधानमन्त्री पदसमेत अस्वीकार गरेको ऐतिहासिक घटनालाई नाटकको महत्वपूर्ण पक्षका रूपमा समेटिएको छ।

सर्वनाम थिएटरका अनुसार व्यक्तिगत स्वार्थ, परिवार, पार्टी, पद र सत्ताभन्दा माथि देश र जनताको अधिकार तथा स्वतन्त्रतालाई प्राथमिकता दिने गणेशमान सिंहको राजनीतिक दर्शनलाई नाटकमार्फत प्रस्तुत गर्न खोजिएको छ।

जीवनका महत्वपूर्ण पाटा समेटिने

नाटकमा गणेशमान सिंहको राजनीतिक जीवनका विभिन्न चरणलाई समेटिएको छ। राणा शासनविरुद्धको आन्दोलन, जेल जीवन, जेलबाट गरिएको साहसिक पलायन तथा २०४६ सालको जनआन्दोलनपछि प्रधानमन्त्री पद अस्वीकार गरेको प्रसंगलाई प्रमुखताका साथ प्रस्तुत गरिएको निर्देशक मल्लले बताए।

नाटकले गणेशमान सिंहको राजनीतिक योगदानसँगै त्याग, निष्ठा र देशप्रतिको समर्पणको पक्षलाई नयाँ पुस्तासम्म पुर्‍याउने उद्देश्य राखेको आयोजकले जनाएको छ।

Originally published on abcnews.com.np.