काठमाडौं । चलचित्र ‘गौँथली’ले बक्सअफिसमा आक्रामक कमाइ गर्दै साढे २५ करोड रुपैयाँ नजिकको ग्रसकलेक्सन गरेको छ। साउन १ गतेदेखि प्रदर्शनमा आएको चलचित्रले आइतबारसम्म २५ करोड ५ लाख ६५ हजार ७७२ रुपैयाँ ग्रसकलेक्सन गरेको चलचित्र विकास बोर्डको बक्सअफिस तथ्यांकले देखाएको छ।

तथ्यांकअनुसार ‘गौँथली’लाई हालसम्म ९ लाख ९ हजार ४२६ दर्शकले हेरेका छन्। योसँगै चलचित्र नेपाली फिल्म उद्योगमा सर्वाधिक कमाइ गर्ने चलचित्रको सूचीमा दोस्रो स्थानमा उक्लिएको छ। यसअघि दोस्रो स्थानमा रहेको ‘कबड्डी–४’लाई पछि पार्दै ‘गौँथली’ दोस्रो स्थानमा पुगेको हो। सर्वाधिक कमाइ गर्ने नेपाली चलचित्रको पहिलो स्थानमा भने ‘पूर्ण बहादुरको सारङ्गी’ कायम छ।

डा. कपिल रिजाल निर्देशित ‘गौँथली’मा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली र सीतादेवी तिमिल्सिनालगायत कलाकारको अभिनय छ।

‘हली’ र ‘लज्जावती’को अवस्था

यस्तै, चलचित्र ‘हली’ले आइतबारसम्म २२ लाख ९६ हजार ९२० रुपैयाँ ग्रसकलेक्सन गरेको छ। चलचित्रका ८ हजार ३८५ टिकट बिक्री भएका छन्। ओम प्रतीक निर्देशित ‘हली’ साउन २२ गतेदेखि प्रदर्शनमा आएको हो।

चलचित्रमा निर्देशक ओम प्रतीकसहित प्रमोद दीप, सुजाता थापा, विद्या कार्की, सरोज खनाल, अरुणा कार्की, अर्जुन गुरुङ, नवीन श्रेष्ठ, कञ्चन दुलाल, कमल गाउँले र विशाल पहाडीलगायत कलाकारको अभिनय छ।

त्यस्तै, साउन २९ गतेदेखि प्रदर्शनमा आएको ‘लज्जावती’ले आइतबारसम्म ७ लाख ६८ हजार ४५० रुपैयाँ ग्रसकलेक्सन गरेको छ। राजबहादुर साने निर्देशित प्रेमकथामा आधारित चलचित्रमा मुकुन भुसाल र श्रीकृष्ण निरौला मुख्य भूमिकामा छन्।

Originally published on abcnews.com.np.