पोखरा । गायिका अम्बिका भण्डारीले यस वर्षको हरितालिका तीजलाई लक्षित गर्दै ‘भइयो दुईतिर’ बोलको नयाँ मौलिक तीज गीत सार्वजनिक गरेकी छन्। लामो समयदेखि हरेक वर्ष तीजका अवसरमा नयाँ गीत सार्वजनिक गर्दै आएकी भण्डारीले यसपटक पनि नारी जीवनको पीडा, संघर्ष र माइती–घर तथा कर्मघरबीचको भावनात्मक सम्बन्धलाई गीतमार्फत प्रस्तुत गरेकी हुन्।

२०६५ सालदेखि निरन्तर तीज गीत सार्वजनिक गर्दै आएकी भण्डारीको नयाँ गीतमा नेपाली महिलाले विवाहपछि भोग्ने भावनात्मक पीडा र जीवनका विभिन्न उतारचढावलाई मार्मिक रूपमा समेटिएको छ।

गीतका शब्दहरूमा—

‘घरै हुनु रैनछ आमा, वनमा बस्ने चरीको,
कसलाई सुनाऊँ वेदना यो मुटुभरीको’

जस्ता भावनात्मक पंक्तिहरू समावेश छन्। त्यस्तै, ‘फूलको थुँगा शिरमै राख्छु, दिन्न आमा झर्न भूइँतिर, घर फेरियो, थर फेरियो, भइयो दुईतिर’ भन्ने शब्दले विवाहपछि महिलाले अनुभव गर्ने परिवर्तित जीवन र भावनात्मक द्वन्द्वलाई चित्रण गरेको छ।

अम्बिकाकै शब्द, स्वर र संगीत

गीतमा अम्बिका भण्डारीकै स्वर, शब्द तथा लय रहेको छ। १४ मिनेट लामो म्युजिक भिडियोसहित सार्वजनिक गरिएको गीत भण्डारीको आफ्नै युट्युब च्यानल ‘अम्बिका भण्डारी’ मार्फत दर्शकमाझ ल्याइएको हो।

गीतको रेकर्डिङ पोखरास्थित बासुरी रेकर्डिङ स्टुडियोमा गरिएको छ। म्युजिक भिडियोमा भावना पन्त र सावित्री अधिकारीको नृत्य रहेको छ भने भिडियोको सम्पादन तथा निर्देशन रामप्रसाद बास्तोलाले गरेका छन्।

कर्मघरको पीडादेखि नारी जीवनको यथार्थसम्म

भण्डारीका अनुसार गीतले नेपाली समाजमा महिलाले कर्मघरमा भोग्नुपर्ने अपजस, कठिनाइ, पीडा र भावनात्मक संघर्षलाई प्रस्तुत गरेको छ। तीजलाई केवल मनोरञ्जनको पर्वका रूपमा नभई नारीहरूले आफ्ना अनुभव, दुःख र भावना अभिव्यक्त गर्ने सांस्कृतिक माध्यमका रूपमा पनि गीतमा चित्रण गरिएको उनले बताइन्।

यसअघि उनले २२ वटा गीत तथा आधा दर्जन साहित्यिक कृति सार्वजनिक गरिसकेकी छन्। हरेक वर्ष मौलिकता र नेपाली समाजको यथार्थसँग जोडिएका तीज गीत ल्याउँदै आएको बताउँदै भण्डारीले दर्शक तथा श्रोताबाट निरन्तर साथ र माया पाएको बताइन्।

‘भइयो दुईतिर’ मार्फत उनले यसपटक विवाहपछि महिलाको जीवनमा आउने परिवर्तन, माइतीसँगको भावनात्मक दूरी र कर्मघरमा सामना गर्नुपर्ने परिस्थितिलाई तीजको मौलिक भाकामा प्रस्तुत गर्ने प्रयास गरेकी छन्।

Originally published on abcnews.com.np.