काठमाडौं । नेपाल राष्ट्र बैंकले विभिन्न पदमा ३४ जना कर्मचारी करार सेवामा नियुक्त गर्न दरखास्त आह्वान गरेको छ। राष्ट्र बैंकको मानव संसाधन व्यवस्थापन विभागले अनलाइन आवेदन खुला गर्दै रक्षक, सिपाही, सवारी चालक, डिस्पेन्सरी तथा कार्यालय सहयोगीलगायत पदमा कर्मचारी माग गरेको हो।

राष्ट्र बैंकले विभिन्न पदमा आवश्यक जनशक्तिका लागि आवेदन माग गरेको जनाएको छ। पदअनुसार आवश्यक शैक्षिक योग्यता तथा अन्य मापदण्ड फरक–फरक तोकिएको छ।

इच्छुक नेपाली नागरिकले भदौ ९ गतेदेखि भदौ २३ गतेसम्म राष्ट्र बैंकको अनलाइन पोर्टलमार्फत आवेदन दिन सक्नेछन्। आवेदनका लागि ८०० रुपैयाँ परीक्षा दस्तुर तोकिएको छ।

उम्मेदवारको उमेर दरखास्त दिने अन्तिम मितिसम्म ४५ वर्ष ननाघेको हुनुपर्ने व्यवस्था गरिएको छ।

लिखितदेखि अन्तर्वार्तासम्म

राष्ट्र बैंकले आवश्यकताअनुसार लिखित परीक्षा, प्रयोगात्मक परीक्षा र अन्तर्वार्ता मार्फत उम्मेदवार छनोट गर्ने जनाएको छ।

तर, कुनै पदमा स्वीकृत उम्मेदवारको संख्या २० जना वा सोभन्दा कम भएमा छनोट प्रक्रिया छोट्याउन सकिनेछ। यस्तो अवस्थामा सम्बन्धित पदका लागि लिखित वा प्रयोगात्मक परीक्षा नलिई सिधै अन्तर्वार्ताबाट समेत छनोट गर्न सकिने व्यवस्था गरिएको छ।

६ महिनाको करार

छनोट भएका कर्मचारीसँग प्रारम्भिक रूपमा ६ महिनाका लागि करार सम्झौता गरिने राष्ट्र बैंकले जनाएको छ। पारिश्रमिक तथा अन्य सुविधा बैंकको प्रचलित नियमानुसार उपलब्ध गराइनेछ।

आवश्यकताअनुसार नियुक्त कर्मचारीलाई राष्ट्र बैंकको केन्द्रीय कार्यालय वा प्रदेशस्थित कार्यालयहरूमा खटाउन सकिनेछ।

Originally published on abcnews.com.np.