काठमाडौं । नयाँ बानेश्वरमा आकाशेपुल प्रयोग गरी बाटो काट्न आग्रह गर्ने महिला प्रहरीलाई गालीगलौज तथा हातपात गरेको आरोपमा पक्राउ परेका एक युवकलाई पाँच दिन हिरासतमा राखेर अनुसन्धान गर्न जिल्ला प्रशासन कार्यालय, काठमाडौंले अनुमति दिएको छ।

मंगलबार बिहान नयाँ बानेश्वरमा सडक पार गर्ने क्रममा प्रहरीले आकाशेपुल प्रयोग गर्न आग्रह गरेपछि विवाद भएको प्रहरीले जनाएको छ। विवाद चर्किंदै जाँदा ती युवकले महिला प्रहरीमाथि गालीगलौज गर्नुका साथै हातपात गरेको आरोप छ।

घटनापछि प्रहरीले युवकलाई नियन्त्रणमा लिएको थियो। जिल्ला प्रहरी परिसर काठमाडौंका प्रवक्ता एसपी दानबहादुर थापाका अनुसार पक्राउ परेका व्यक्तिमाथि थप अनुसन्धानका लागि पाँच दिन हिरासतमा राख्ने अनुमति प्राप्त भएको छ।

पक्राउ पर्नेमा जुम्लाको तातोपानी गाउँपालिका–२ घर भई हाल काठमाडौं महानगरपालिका–३१ मा बस्दै आएका २७ वर्षीय राज कठायत रहेका छन्।

दुई कसूरमा अनुसन्धान

प्रहरीले कठायतविरुद्ध राष्ट्रसेवकलाई बाधा–विरोध गर्न नहुने तथा अभद्र व्यवहार गर्न नहुने सम्बन्धी कसूरमा अनुसन्धान अघि बढाएको जनाएको छ।

प्रहरीका अनुसार घटनासम्बन्धी थप प्रमाण संकलन र आवश्यक अनुसन्धान जारी रहेको छ।

Originally published on abcnews.com.np.