भोजपुर । भोजपुरका क्रियाशील निर्माण व्यवसायीहरूले जिल्ला निर्माण व्यवसायी संघको लामो समयदेखि रोकिएको साधारणसभा र अधिवेशन गराउन पहल गरिदिन प्रमुख जिल्ला अधिकारीसमक्ष गुहार लगाएका छन्।

संघको अधिवेशन र साधारणसभा नहुँदा निर्माण व्यवसायीका समस्या ओझेलमा परेको तथा संस्थामा सीमित व्यक्तिको नियन्त्रण कायम रहेको आरोप लगाउँदै करिब ७० वटा निर्माण कम्पनीका प्रतिनिधिले संयुक्त रूपमा जिल्ला प्रशासन कार्यालय भोजपुरमा निवेदन बुझाएका हुन्।

व्यवसायीहरूले २०६२ सालपछि संघको अधिवेशन नभएको, समयअनुकूल विधान संशोधन नगरिएको तथा जिल्लामा करिब दुई सय निर्माण व्यवसायी क्रियाशील रहे पनि करिब ४० जनालाई मात्र सदस्यता दिएर ठूलो संख्यामा रहेका व्यवसायीलाई संस्थाबाट बाहिर राखिएको गुनासो गरेका छन्।

‘संघलाई बन्धक बनाइयो’

निर्माण व्यवसायी संघ भोजपुरका अध्यक्ष धर्मराज राई संघ स्थापना भएको २०५२ सालदेखि निरन्तर अध्यक्ष पदमा रहेको व्यवसायीहरूको दाबी छ। उनी नेपाली कांग्रेसका पूर्व जिल्ला उपसभापतिसमेत हुन् भने २०७० सालको संविधानसभा निर्वाचनमा भोजपुर क्षेत्र नम्बर १ बाट उम्मेदवार बनेका थिए।

व्यवसायीहरूले राईको नेतृत्वमा संघमा लामो समयदेखि अधिवेशन नगरिएको र सदस्यतामा समेत सीमितता तथा सिण्डिकेट कायम गरिएको आरोप लगाएका छन्।

एक निर्माण व्यवसायीले भने, “उहाँले संघलाई बन्धक बनाउनु भयो। २१ वर्षदेखि अधिवेशन भएको छैन। सदस्यतामा सिण्डिकेट लगाइयो। संस्थालाई लोकतान्त्रिक पद्धतिबाट बाहिर लगियो। पटक–पटक आग्रह गर्दा पनि सुनुवाइ नभएपछि सीडीओ कार्यालय पुग्न बाध्य भएका हौँ।”

सबै व्यवसायीलाई सदस्यता दिन माग

व्यवसायीहरूले यथाशीघ्र संघको साधारणसभा तथा अधिवेशन गराउने प्रक्रिया अघि बढाउन प्रशासनसँग माग गरेका छन्। साथै जिल्लामा क्रियाशील सबै निर्माण व्यवसायीलाई संघमा आबद्ध हुने समान अवसर र वातावरण सुनिश्चित गर्न पनि आग्रह गरेका छन्।

लामो समयदेखि अधिवेशन नहुँदा संस्थागत नेतृत्व, प्रतिनिधित्व र व्यवसायीका साझा मुद्दा प्रभावित भएको उनीहरूको भनाइ छ। अब प्रशासनको पहलमा संघको विधान, सदस्यता र नेतृत्व चयन प्रक्रियालाई लोकतान्त्रिक तथा समावेशी ढंगले अघि बढाउनुपर्ने माग निर्माण व्यवसायीहरूले गरेका छन्।

Originally published on abcnews.com.np.