काठमाडौँ । नेकपा (एमाले) का अध्यक्ष केपी शर्मा ओलीले पार्टीको केन्द्रीय कमिटी बैठक बोलाउने तयारी गर्न महासचिव शंकर पोखरेललाई निर्देशन दिएका छन्।

अध्यक्ष ओलीले भदौ २५, २६ र २७ गते केन्द्रीय कमिटीको बैठक आयोजना गर्ने गरी आवश्यक तयारी गर्न सोमबार गुण्डुबाट फोनमार्फत महासचिव पोखरेललाई निर्देशन दिएको स्रोतले जनाएको छ।

अध्यक्षको निर्देशनपछि महासचिव पोखरेलले केन्द्रीय कमिटी बैठकअघि पार्टीभित्र आवश्यक आन्तरिक छलफल गर्नुपर्ने प्रस्ताव राखेका छन्। उनले पार्टी पुनर्गठनका लागि गठन गरिएको कार्यदलको बैठक तथा त्यसपछि सचिवालय बैठक बसाएर आवश्यक निष्कर्ष निकाल्नुपर्ने धारणा अध्यक्ष ओलीसमक्ष राखेको बताइएको छ।

कार्यदल र सचिवालय बैठकको प्रस्ताव

महासचिव पोखरेलले पार्टीको आगामी रणनीति, संगठनात्मक पुनर्गठन तथा अन्य समसामयिक विषयमा प्रारम्भिक छलफल गर्न पहिले कार्यदलको बैठक बस्नुपर्ने बताएका छन्। कार्यदलबाट आएका सुझाव र निष्कर्षलाई सचिवालय बैठकमा छलफल गरी त्यसपछि केन्द्रीय कमिटीमा लैजान उपयुक्त हुने उनको प्रस्ताव रहेको स्रोतको भनाइ छ।

यसअनुसार कार्यदल र सचिवालय बैठकको कार्यसूची तथा समय तय भएपछि केन्द्रीय कमिटी बैठकको औपचारिक तयारी अघि बढ्नेछ। आगामी केन्द्रीय कमिटी बैठकमा पार्टी पुनर्गठन, संगठनात्मक अवस्था र आगामी राजनीतिक रणनीतिसहितका विषयमा छलफल हुने अपेक्षा गरिएको छ।

Originally published on abcnews.com.np.