इलाम । श्रम संस्कृति पार्टीका वरिष्ठ नेता सुदन किरातीले प्रधानमन्त्री बालेन्द्र शाहको कार्यशैलीमाथि कटाक्ष गर्दै जनताले देशको नेतृत्वको जिम्मेवारी दिए पनि उनले त्यसअनुसार जिम्मेवार ढंगले काम गर्न नसकेको टिप्पणी गरेका छन्।

इलामको बिप्लेटेमा आयोजित पार्टीको ‘जनहातेमालो’ कार्यक्रमलाई सम्बोधन गर्दै किरातीले प्रधानमन्त्री शाहमाथि व्यंग्य गर्दै भने, ‘जनताले बालेनलाई देशकै चाबी दिए, तर ड्राइभर चाहिँ एम्बुलेन्सको परेछ।’

प्रधानमन्त्रीले पछिल्ला दिनमा देखाएको व्यवहार र कार्यशैलीमाथि प्रश्न उठाउँदै उनले सडकमा सवारी चलाउने चालकले समेत नियम पालना गर्नुपर्ने भए सार्वभौम मतबाट निर्वाचित नेतृत्वले झन् कानुन र नियमको सम्मान गर्नुपर्ने बताए।

‘ट्राफिक लाइट पनि नहेर्ने, अर्काको लेन पनि मिच्ने, जसलाई पायो त्यसलाई किच्याउने, जहाँ पायो त्यहीँ छिर्ने र जता पायो त्यतै पार्किङ गर्ने गरिरहेको छ,’ उनले भने, ‘सार्वभौमिक अधिकार प्रयोग गरेर नागरिकले आफ्नो अमूल्य मतद्वारा चुनेको ड्राइभरले नियम–कानुन त मान्नुपर्छ होला नि ?’

प्रधानमन्त्री शाहको पछिल्लो मुस्ताङ र पोखरा भ्रमणका क्रममा ट्राफिक नियम उल्लङ्घन भएको विषयलाई लिएर विभिन्न पक्षबाट आलोचना भइरहेको सन्दर्भमा किरातीले यस्तो टिप्पणी गरेका हुन्।

किरातीले आगामी प्रदेश र स्थानीय तहको निर्वाचनलाई लक्षित गर्दै अब देशको राजनीतिक यात्राको ‘गाडीको चाबी’ श्रम संस्कृति पार्टीले लिनुपर्ने धारणा पनि राखे।

त्यसका लागि पार्टी संगठनलाई जनताको घरदैलो र जरासम्म पुर्‍याउनुपर्ने उनको भनाइ थियो। जनतासँग प्रत्यक्ष हातेमालो गर्दै बलियो राजनीतिक तथा संगठनात्मक आधार निर्माण गर्न सके मात्रै वैकल्पिक राजनीतिक शक्ति स्थापित हुन सक्ने उनले बताए।

‘सरकार जनताको शासक होइन, सेवक हो भन्ने कुरा व्यवहारबाट प्रमाणित गर्नुपर्छ,’ किरातीले भने।

कार्यक्रमका क्रममा विभिन्न राजनीतिक दल परित्याग गरेका दर्जनौं कार्यकर्तालाई श्रम संस्कृति पार्टीमा प्रवेश गराइएको पनि जनाइएको छ।

Originally published on abcnews.com.np.