काठमाडौं । प्रहरी प्रधान कार्यालयले लामो समयदेखि गैरहाजिर रहेका एक प्रहरी सहायक निरीक्षकसहित १२ जना प्रहरीलाई सेवाबाट हटाउने तयारी गरेको छ । कार्यालयले उनीहरूलाई गैरहाजिर रहनुको कारणसहित स्पष्टीकरण माग गरेको हो ।

प्रहरी प्रधान कार्यालयअन्तर्गतको कानुन शाखाले बुधबार सूचना जारी गर्दै प्रहरी सहायक निरीक्षक खड्गबहादुर गुरुङसहित एक जना प्रहरी हवल्दार, पाँच जना प्रहरी सहायक हवल्दार र पाँच जना प्रहरी जवानसँग स्पष्टीकरण माग गरेको जनाएको छ । उनीहरू लामो समयदेखि आफ्नो कर्तव्यमा अनुपस्थित रहेको कार्यालयले जनाएको छ ।

कार्यालयले प्रकाशित मितिले बाटोको म्यादबाहेक सात दिनभित्र कार्यालयमा उपस्थित भई गैरहाजिर रहनुको कारणसहित चित्तबुझ्दो स्पष्टीकरण पेस गर्न भनेको छ । तोकिएको समयभित्र स्पष्टीकरण पेस नगरेमा वा पेस गरिएको स्पष्टीकरण सन्तोषजनक नभए प्रहरी नियमावलीबमोजिम सेवाबाट हटाउने चेतावनी दिइएको छ ।

प्रहरी प्रधान कार्यालयले गैरहाजिर रहेका प्रहरी कर्मचारीलाई आफ्नो कर्तव्यमा नफर्किनुको कारण स्पष्ट गर्न मौका दिएको हो । स्पष्टीकरणपछि प्राप्त जवाफका आधारमा उनीहरूमाथि आवश्यक कारबाही अघि बढाइने कार्यालयले जनाएको छ ।

Originally published on abcnews.com.np.