रसुवा । रसुवा जिल्लाको भोटेकोशी नदीमा बुधबार बिहान आएको भीषण बाढीपछि नेपाली सेनाले खोज, उद्धार तथा विपद् व्यवस्थापनका लागि आफ्ना विशेष टोली परिचालन गरेको छ। टिमुरे, स्याफ्रुबेँसीलगायतका क्षेत्रमा बाढीले ठूलो क्षति पुर्‍याएको प्रारम्भिक जानकारी आएपछि नेपाली सेना स्थल तथा हवाई माध्यमबाट उद्धारमा जुटेको हो।

नेपाली सेनाका अनुसार प्रभावित क्षेत्रको खोज तथा उद्धारका लागि दुईवटा हेलिकप्टर त्रिशूली पुगेका छन्। साथै, त्रिशूलीस्थित जिल्ला अस्पताललाई सहयोग पुर्‍याउन नेपाली सेनाको इमरजेन्सी मेडिकल टिम (ईएमआरटी) पनि एमआई–१७ हेलिकप्टरसहित परिचालन गरिएको छ।

धुन्चे र त्रिशूली ब्यारेकबाट उद्धार टोली प्रभावित क्षेत्रमा खटिएको छ। त्यस्तै, गजुरीस्थित नम्बर ६ बाहिनी अड्डाबाट विपद् व्यवस्थापनमा दक्ष जनशक्ति पनि परिचालन गरिएको नेपाली सेनाले जनाएको छ। हाल बाढीबाट भएको मानवीय तथा भौतिक क्षतिको विस्तृत विवरण संकलन भइरहेको छ।

दुई बजार तहसनहस, भन्सार क्षेत्र बगायो

रसुवाका सहायक प्रमुख जिल्ला अधिकारी ध्रुवप्रसाद अधिकारीका अनुसार लेन्दे खोला अर्थात् भोटेकोशीमा आएको भीषण बाढीले रसुवा नाकाको क्षेत्रमा व्यापक क्षति पुर्‍याएको छ।

उनका अनुसार टिमुरे बजारसहित दुईवटा बजार क्षेत्र तहसनहस भएका छन्। बाढीले रसुवा भन्सार क्षेत्रमा रहेका सवारीसाधन, मालसामान तथा अन्य सामग्रीसमेत बगाएको प्रारम्भिक जानकारी प्राप्त भएको छ।

अधिकारीले बजार क्षेत्र र भन्सार कार्यालयमा समेत गम्भीर क्षति पुगेको बताएका छन्। गत वर्षको बाढीबाट क्षति भएपछि हालै निर्माण सम्पन्न गरिएको नयाँ पुलसमेत यसपटकको बाढीले बगाएको जानकारी दिइएको छ।

त्रिशूली र नारायणी तटीय क्षेत्रमा उच्च सतर्कता

बाढीको प्रभाव तल्लो तटीय क्षेत्रमा समेत पर्न सक्ने सम्भावनालाई ध्यानमा राख्दै नेपाली सेनाले त्रिशूली र नारायणी नदी किनारका बासिन्दालाई उच्च सतर्कता अपनाउन आग्रह गरेको छ।

नेपाली सेनाले स्थानीय प्रशासन, सुरक्षा निकाय र विपद् व्यवस्थापन संयन्त्रसँग सहकार्य गर्दै उद्धार तथा राहत कार्य अघि बढाइरहेको जनाएको छ। प्रभावित क्षेत्रमा अझै पनि क्षतिको पूर्ण विवरण आउन बाँकी रहेकाले उद्धार र खोजी कार्यलाई तीव्र बनाइएको छ।

Originally published on abcnews.com.np.