रसुवा । भोटेकोशी नदीमा बुधबार बिहान आएको भीषण बाढी र त्यसपछिको सम्भावित जोखिमका कारण पृथ्वी राजमार्ग तथा पासाङल्हामु राजमार्गमा सार्वजनिक सवारी साधन सञ्चालन रोकिएको छ।

काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार काठमाडौंबाट पृथ्वी राजमार्ग हुँदै चितवनलगायत पश्चिमी क्षेत्र, पोखरा, गोरखा, लमजुङ तथा धादिङ जाने सवारीसाधन काठमाडौंबाटै रोकिएको छ।

त्यस्तै, नुवाकोट र रसुवातर्फ जाने सवारीसाधनको सञ्चालन पनि रोकिएको प्रहरीले जनाएको छ।

भोटेकोशी क्षेत्रमा आएको भीषण बाढी र विभिन्न स्थानमा उत्पन्न हुन सक्ने पहिरो तथा अन्य जोखिमलाई ध्यानमा राख्दै थप सूचना जारी नभएसम्म सार्वजनिक सवारी सञ्चालन बन्द राखिएको प्रहरीको भनाइ छ।

यात्रुहरूलाई अनावश्यक यात्रा नगर्न र सडकको पछिल्लो अवस्थाबारे आधिकारिक सूचना लिएर मात्र यात्रा गर्न ट्राफिक प्रहरीले आग्रह गरेको छ।

Originally published on abcnews.com.np.