काठमाडौं । रसुवामा बुधबार बिहान आएको भीषण बाढीले ठूलो जनधनको क्षति पुर्‍याएपछि आज बस्ने भनिएको प्रतिनिधिसभा बैठक प्रभावित हुन सक्ने भएको छ।

आजको प्रतिनिधिसभा बैठकमा प्रधानमन्त्री वालेन्द्र शाह (बालेन) ले सांसदहरूले उठाएका प्रश्नको जवाफ दिने कार्यसूची रहेको थियो। तर तिब्बततर्फबाट आएको भनिएको भीषण बाढीपछि प्रधानमन्त्री शाहले उद्धार, राहत तथा आगामी रणनीतिबारे छलफल गर्न उच्चस्तरीय बैठक बोलाएका छन्।

यसका कारण प्रतिनिधिसभाको बैठक निर्धारित समयमै बस्ने वा कार्यसूचीमा परिवर्तन हुने भन्ने विषय अन्योलमा रहेको संसद सचिवालयले जनाएको छ।

संसद सचिवालयका सहसचिव तथा प्रवक्ता एकराम गिरीले देशको असहज परिस्थितिका कारण बैठकबारे छलफल भइरहेको जानकारी दिए।

उनले भने, ‘देशको अवस्था आज असहज नै छ, अब के गर्ने भन्ने छलफलपछि थाहा हुन्छ।’

प्रतिनिधिसभा बैठक सञ्चालनबारे सभामुख डोलप्रसाद अर्यालले समेत आवश्यक परामर्श गरिरहेको संसद सचिवालयले जनाएको छ।

यसैबीच रसुवाको बाढीबाट भएको ठूलो जनधनको क्षतिप्रति विभिन्न राजनीतिक दलका नेताहरूले दुःख व्यक्त गरेका छन्। राष्ट्रिय स्वतन्त्र पार्टीका सभापति रवि लामिछाने र नेपाली कम्युनिस्ट पार्टीका संयोजक प्रचण्डले विज्ञप्ति जारी गर्दै प्रभावित नागरिकको तत्काल खोज, उद्धार र राहतमा जुट्न सरकार तथा सम्बन्धित निकायलाई आग्रह गरेका छन्।

Originally published on abcnews.com.np.