काठमाडौं । रसुवा जिल्लामा बुधबार बिहान आएको अचानकको भीषण बाढीपछि ४७७ जना व्यक्ति सम्पर्कविहीन भएका छन्।

सम्पर्कविहीन हुनेमा ७९ जना सुरक्षाकर्मी, १४ जना भन्सार कर्मचारी तथा ३८४ जना स्वदेशी तथा विदेशी पर्यटक रहेका छन्। बाढीले रसुवासहित नुवाकोट र धादिङमा ठूलो जनधनको क्षति पुर्‍याएको छ।

७९ सुरक्षाकर्मी सम्पर्कविहीन

परराष्ट्रमन्त्री शिशिर खनालका अनुसार २६ जना नेपाल प्रहरी र ९ जना सशस्त्र प्रहरी सम्पर्कविहीन छन्। त्यस्तै, नेपाली सेनाको टिमुरे र मैलुङ पोस्टमा कार्यरत ४४ जना सुरक्षाकर्मी पनि सम्पर्कमा आएका छैनन्।

यसरी तीनवटै सुरक्षा निकायका गरी ७९ जना सुरक्षाकर्मीको अवस्था अज्ञात रहेको छ।

१४ भन्सार कर्मचारी सम्पर्कविहीन

रसुवागढी भन्सार तथा अध्यागमन कार्यालयका १४ जना कर्मचारी पनि सम्पर्कविहीन रहेको अर्थ मन्त्रालयले जनाएको छ।

रसुवा भन्सारमा ३६ स्थायी दरबन्दीमध्ये प्रमुख भन्सार प्रशासक राजेन्द्र ढुंगानासहित २५ जना सम्पर्कमा रहेका छन्। चार करार तथा ज्यालादारी कर्मचारीमध्ये एक जना सम्पर्कमा आएका छन्।

यसअनुसार ११ स्थायी र ३ करार तथा ज्यालादारी गरी १४ कर्मचारीको खोजी भइरहेको मन्त्रालयले जनाएको छ।

३८४ पर्यटक सम्पर्कविहीन

नेपाल पर्यटन बोर्डका अनुसार बाढीपछि ३८४ जना स्वदेशी तथा विदेशी पर्यटक सम्पर्कविहीन भएका छन्।

सम्पर्कविहीन पर्यटकमध्ये २९१ जना विदेशी र ९३ जना नेपाली रहेका छन्। विदेशी पर्यटकमध्ये मात्रै १०५ जनाभन्दा बढी भारतीय नागरिक रहेको बोर्डले जनाएको छ।

हराइरहेका पर्यटकको अवस्था पत्ता लगाउन पर्यटन बोर्डले विभिन्न सरकारी तथा सुरक्षा निकायसँग समन्वय गरी विवरण संकलन गरिरहेको छ।

खोजी तथा उद्धार जारी

बुधबार बिहान करिब साढे ८ बजे चीनको तिब्बततर्फबाट आएको बाढी भोटेकोसी नदीमा प्रवेश गरेपछि रसुवामा ठूलो क्षति भएको हो।

बाढीले मानिससँगै सडक, पुल, जलविद्युत् आयोजना, सरकारी तथा निजी संरचनामा समेत ठूलो क्षति पुर्‍याएको छ। सम्पर्कविहीन व्यक्तिहरूको खोजी तथा उद्धार कार्य जारी रहेको र थप विवरण संकलन भइरहेको सम्बन्धित निकायले जनाएका छन्।

Originally published on abcnews.com.np.