काठमाडौं । रसुवामा आएको बाढीबाट हुन सक्ने सम्भावित जोखिमलाई मध्यनजर गर्दै सशस्त्र प्रहरी बल (एपीएफ) ले उद्धार तथा स्वास्थ्य उपचारका लागि आवश्यक तयारी तीव्र बनाएको छ।

सशस्त्र प्रहरी बलअन्तर्गतको एपीएफ अस्पतालमा १०० शय्या तयारी अवस्थामा राखिएको छ भने आवश्यक स्वास्थ्यकर्मीको टोलीलाई पनि तयारी अवस्थामा राखिएको सशस्त्र प्रहरीका सहायक प्रवक्ता डीएसपी शैलेन्द्र थापाले जानकारी दिए।

उनका अनुसार कीर्तिपुरस्थित दंगा नियन्त्रण रेजिमेन्टबाट तीन प्लाटुन सुरक्षाकर्मी काठमाडौंको त्रिभुवन अन्तर्राष्ट्रिय विमानस्थलमा तयारी अवस्थामा खटाइएको छ। आवश्यकताअनुसार उनीहरूलाई तत्काल प्रभावित क्षेत्रमा परिचालन गरिनेछ।

यसैगरी, सशस्त्र प्रहरीको २० नम्बर विपद् उद्धार उपत्यका गणबाट ४५ जनाको टोली नुवाकोटतर्फ प्रस्थान गरेको छ। उक्त टोलीले प्रभावित क्षेत्रको अवस्था बुझ्नुका साथै आवश्यकताअनुसार खोज तथा उद्धार कार्यमा परिचालन हुने बताइएको छ।

उद्धार तथा राहतका लागि तयारी

रसुवाको पछिल्लो अवस्थाबारे विस्तृत विवरण आउन बाँकी रहे पनि सम्भावित जोखिमलाई ध्यानमा राखेर सशस्त्र प्रहरीले जनशक्ति, स्वास्थ्य सेवा तथा उद्धार सामग्री तयारी अवस्थामा राखेको छ।

बाढी प्रभावित क्षेत्रमा आवश्यकता देखिए तत्काल थप सुरक्षाकर्मी तथा स्वास्थ्यकर्मी परिचालन गरिने सशस्त्र प्रहरीले जनाएको छ।

Originally published on abcnews.com.np.