रसुवा । रसुवा जिल्लामा निर्माणाधीन लाङटाङ खोला जलविद्युत् आयोजना भोटेकोसी नदीमा आएको भीषण बाढीले ठूलो क्षति व्यहोरेको छ। एक सातापछि विद्युत् उत्पादन सुरु गरेर राष्ट्रिय प्रसारण लाइनमा जोडिने तयारी गरिरहेको सो आयोजनाको पावर हाउस बाढीले पूर्णरूपमा बगाएको छ। बाढीका कारण करिब ६० जना कर्मचारी तथा मजदुर सम्पर्कविहीन भएका छन्।

बुधबार बिहान चीनको तिब्बततर्फबाट आएको भोटेकोसी नदीको बाढीले आयोजना क्षेत्रमा व्यापक क्षति पुर्‍याएको हो। निर्माण कम्पनी मल्टी इनर्जी प्रालिका प्रबन्ध निर्देशक विजयमोहन भट्टराईका अनुसार, बाढी आउँदा कर्मचारी र मजदुरहरू सुरुङभित्र कंक्रिट ढलानको काम गरिरहेका थिए। आयोजनामा मल्टी इनर्जीका २५ जना इन्जिनियर, ओभरसियर, गार्ड र भान्छेसहित पेटी कन्ट्र्याक्टरतर्फका ३५ जना मजदुर कार्यरत थिए, जो बिहानदेखि सम्पर्कमा नरहेको भट्टराईले जानकारी दिए।

‘अर्को साता बत्ती बाल्ने तयारी थियो। तीन दिनअघि मात्रै फिल्डमा गएर आएको थिएँ,’ प्रबन्ध निर्देशक भट्टराईले भने, ‘आयोजना त फेरि बनाउँला, तर हाम्रा काबिल इन्जिनियर र मजदुरहरूको अवस्था अज्ञात हुँदा मन बेचैन भएको छ।’ उनका अनुसार बाढीले आयोजनाको पावर हाउसको संरचना नै नरहने गरी क्षति पुर्‍याएको छ। प्राकृतिक जलसतहभन्दा करिब १ सय २५ मिटर माथिसम्म बाढी उफ्रेको थियो।

स्वतन्त्र ऊर्जा उत्पादकहरूको संस्था नेपाल (इप्पान) का सचिवसमेत रहेका भट्टराईले यो घटनालाई सामान्य बाढी नभई ‘महाप्रलय’ को संज्ञा दिएका छन्। अहिले आयोजनाको क्षतिभन्दा पनि सम्पर्कविहीन कर्मचारी तथा मजदुरको खोजीलाई प्राथमिकता दिनुपर्ने उनले बताए। ‘प्रोजेक्ट त फेरि बनाऔँला, तर मान्छे कहाँबाट ल्याउने?’ भन्दै मानवीय क्षति नै सबैभन्दा ठूलो चिन्ताको विषय भएको बताए।

Originally published on abcnews.com.np.